Օնիկ Գասպարյանին խոչընդոտում են իրականացնել իր լիազորությունները․ կան շահադիտական դրդումներ. փաստաբան

Այսօր վարչապետ Նիկոլ Փաշինյանը հայտարարեց, որ Արտակ Դավթյանն իրավունքի ուժով համարվում է նշանակված ՀՀ ԶՈՒ գլխավոր շտաբի պետի պաշտոնին, իսկ այս պահին նորանշանակ պետին ներկայացնում է ԶՈՒ հրամկազմին:  ԼՈՒՐԵՐ․com-ի հետ զրույցում Օնիկ Գասպարյանի փաստաբան Արթուր Հովհաննիսյանն անդրադառնալով այս հանգամանքին տեսակետ հայտնեց, որ փաստացի գործադիրն արհամարհում է դատական ակտը և անտեսելով այն, որ դատարանն ասում է Օնիկ Գասպարյանը պաշտոնից չի ազատվել, վարչապետը նման հայտարարություն է անում։

«Օնիկ Գասպարյանը դատական ակտի ուժով ԳՇ պետ է, մինչդեռ Պաշտպանության նախարարը և վարչապետը իրենց գործողություններով և անգործությամբ խոչընդոտում են, որ Գասպարյանը դատական ակտի հիման վրա իրականացնի իր լիազորությունները: Մենք կարծում ենք՝ այստեղ կան շահադիտական դրդումներ, դրա համար էլ մեր հաղորդումներն այսօր կամ վաղը կուղարկենք Գլխավոր դատախազություն՝ քրեական գործ հարուցելու։ Վարչական դատարանում էլ կշարունակեք պարոն Գասպարյանի պաշտպանությունը, անհրաժեշտ շտկումնեը կանենք վերջին իրադրությամբ պայմանավորված»,– նշեց փաստաբանը՝ ավելացնելով, որ հետագայում հավանաբար նոր անակնկալներ կունենան։ 

Փաստաբանի խոսքով՝ եթե դատարանը բավարարի իրենց առաջիկա միջնորդությունը, ապա կունենան մի թուղթ, որով պետք է հաստատվի, որ Արտակ Դավթյանը ԳՇ պետ չէ։

Հիշեցնենք, որ փետրվարի 25–ին ԶՈՒ ԳՇ–ն՝ Օնիկ Գասպարյանի գլխավորությամբ, հայտարարությամբ հանդես եկավ՝ պահանջելով իշխանությունների հրաժարականը։ Վարչապետը դա համարեց ռազմական հեղաշրջման փորձ և առաջարկություն ուղարկեց ՀՀ նախագահին Օնիկ Գասպարյանին ԳՇ պետի պաշտոնից ազատելու վերաբերյալ։ Նախագահ Արմեն Սարգսյանը չստորագրեց Օնիկ Գասպարյանին ԳՇ պետի պաշտոնից ազատելու վերաբերյալ վարչապետի առաջարկությունը և դիմեց Սահմանադրական դատարան «Զինվորական ծառայության եւ զինծառայողի կարգավիճակի մասին» 2017թ. նոյեմբերի 15-ի օրենքի՝ Սահմանադրությանը համապատասխանելու հարցը որոշելու խնդրանքով: Դրանից հետո նախագահն ու վարչապետը միջնորդություններն ուղարկում էին միմյանց, սակայն հարցն այդպես էլ լուծում չէր ստանում։ 

Օնիկ Գասպարյանն ուղերձով նշեց, որ իր դիրքորոշումը չի փոխվել և իր պաշտոնից ազատման ողջ գործընթացը հակասահմանադրական են։ Նա դիմել էր  ՀՀ վարչական դատարան։ Դատարանը մարտի 17–ին,  բավարարել Էր պաշտպանական կողմի միջնորդությունը հայցի ապահովման միջոց կիրառելու մասին։ Սակայն, վարչապետի աշխատակազմը հայտարարություն տարածեց, որ Օնիկ Գասպարյանն ազատված է ՀՀ ԶՈՒ ԳՇ պետի պաշտոնից։ Գասապարյանի փաստաբանը դատարանի որոշումից հետո հայտարարարել էր՝ Օնիկ Գասպարյանը շարունակում է կատարել ՀՀ զինված ուժերի Գլխավոր շտաբի պետի պարտականությունները և առավոտյան գնացել է աշխատանքի։

Սոնա Հարությունյան