Սամվել Աթոյանն ու ընկերները ոչնչացրել են թշնամու դիվերսիոն խումբը, ապա զոհվել՝ ԱԹՍ-ի հարվածից

Հասարակություն 23 Մարտ, 2021 22:01

Հոկտեմբերի 4-ին՝ ժամը 10:00-ին, 43-ամյա Սամվել Աթոյանը, ներկայացել է Մասիվի զինկոմիսարիատ: Ժամեր անց՝ «Մոբ»-ի հետ միասին, մեկնել է ռազմաճակատ: Հարազատները, թեև հուզվում ու անհանգստանում էին, սակայն չեն փորձել Սամվելին հերոսական քայլից հետ պահել:

«Գնացինք ճանապարհելու, բոլորը հերոսական ու հաղթական էին տրամադրված, մենք էլ գիտակցում էինք, որ հայրենիքի հանդեպ յուրաքանչյուրս պարտավորվածություն ունենք»,- ԼՈՒՐԵՐ.com-ի հետ զրույցում պատմում է Սամվել Աթոյանի եղբոր աղջիկը՝ Ամալյա Աթոյանը:

Սկզբում կռվել են Հադրութում, իսկ հետո՝ Ջրականում։ Ամալյայի խոսքով՝ Սամվելն ու զինակից ընկերները ոչնչացրել են թշնամու դիվերսիոն խումբը, որից հետո դիրքեր վերադառնալու ճանապարհին զոհվել են՝ ԱԹՍ-ի հարվածից: Սամվելի սխրանքների մասին հարազատներն այդքան տեղեկություն չունեն, որովհետև նրա հետ զոհվել են նաև զինակից ընկերները: Հարազատները միայն կարողացել են խոսել հերոսի կապիտանի հետ, ով ասել է՝ պատերազմի օրերին էլ հումորն ու լավատեսությունը մշտապես ուղեկցել են Սամվելին:

«Պատերազմի օրերին հաճախ չէր զանգում, ավելի շատ նամակագրությամբ ենք շփվել: Երբեք չի ասել, որ իրավիճակը ծանր է, մարտերի մեջ ենք, միշտ ասել է՝ ամեն ինչ լավ է, առաջ ենք գնում, հաղթում ենք, հանգիստ քնե՛ք: Քանի դեռ այստեղ եմ ու ինձ պես հազարավոր քաջ տղերք նույնպես, դուք այդտեղ պարտավոր եք հանգիստ լինելու»,- հիշում է Սամվելի զարմուհին:

Սամվելի հետ վերջին անգամ խոսել են հոկտեմբերի 9-ին, հերոսն ասել է, որ իրավիճակը փոքր-ինչ լարված է. «Բոլորին բարևի՛ր, ասա, որ լավ եմ, չանհանգստանաք: Հնարավոր է՝ 2 օր չզանգեմ, պիտի տեղափոխվեմ, կապի խնդիր կարող է լինել: Երեխեքիս ասա՝ չմտածեն, քանի իրենց հայրիկն այստեղ կռիվ է տալիս, իրենք լավ ապագա են ունենալու: Ես իմ երեխեքի համար խաղաղ ու անհոգ կյանք եմ ուզում, դրա համար մինչև կյանքիս վերջ կռիվ եմ տալու»,- վերջին խոսակցության ժամանակ կնոջն ասել է Սամվելը:

Հերոսի մասին, որ հարազատներին խոստացել էր 2 օրից զանգել, 3 օր շարունակ լուր չեն ունեցել: 4-րդ օրը՝ հոկտեմբերի 13-ին, ընտանիքն իմացել է ցավալին՝ Սամվելը հերոսացել է՝ հանուն հայրենիքի:

Բնավորությամբ աշխույժ, կատակասեր, անմիջական ու ընկերասեր Սամվելն ամուսնացած էր, ունի 3 երեխա: Նրանց նկատմամբ անչափ հոգատար ու ուշադիր էր:

Ամալյան նշում է՝ ցանկացած հարցում հորեղբայրն իր կողքին է եղել, խորհուրդներով օգնել, իրենք էլ մի ընտանիքի պես են եղել, իրար՝ թև ու թիկունք:

Սամվել Աթոյանը հուղարկավորված է Զեյթունի գերեզմանատանը:

Արփինե Հակոբյան