Թուրքիան վաղեմի և արժեքավոր դաշնակից է. ԱՄՆ պետքարտուղար

ՆԱՏՕ-ն չափազանց շահագրգռված է, որ Թուրքիան դաշինքից չհեռանա, չնայած Անկարայի հետ ունեցած տարաձայնություններին: Այս մասին այսօր ասել է ԱՄՆ պետքարտուղար Էնթոնի Բլինքենը՝ ելույթ ունենալով Բրյուսելում «Անդրատլանտյան կապերի ամրապնդում» թեմայով վեբինարում, փոխանցում է ՏԱՍՍ-ը: 

«Թուրքիան վաղեմի եւ արժեքավոր դաշնակից է: Մենք անչափ շահագրգռված ենք, որ նրան ՆԱՏՕ-ում «ամրացնենք»: Եվ մենք կարծում ենք, որ դա նաեւ Թուրքիայի շահերի շրջանակում է»,- ասել է նա:

Բլինքենի խոսքով՝ ՆԱՏՕ-ի անդամների միջեւ տարաձայնություններ կան, սակայն դաշինքը կարող է ավելի ուժեղանալ, եթե դրանք հաղթահարի:

Բլինքենը Թուրքիայի հետ հարաբերություններում գլխավոր խնդիրներից մեկն է անվանել 2017 թվականին Անկարային Ս-400 ԶԶՀ-ների Մոսկվայի մատակարարումների պայմանագիրը: Թուրքիան ՆԱՏՕ-ի երկրներից առաջինն է այդ համակարգերը Ռուսաստանից ձեռք բերել: Անկարայի որոշումը հարուցել էր ԱՄՆ եւ ընդհանուր առմամբ դաշինքի կտրուկ բացասական արձագանքը: Միացյալ Նահանգները չի դադարեցնում փորձերը՝ հասնելու ռուսական ԶՀՀ-ներից Թուրքիայի հրաժարվելուն: Այն հանգամանքով պայմանավորված, որ Թուրքիան չի ենթարկվում ճնշման եւ չի հրաժարվում Ս-400-ներից, Վաշինգտոնն Անկարային հանեց 5-րդ սերնդի F-35 կործանիչ-ռմբակոծիչների արտադրության ամերիկյան ծրագրից: 2020 թվականի դեկտեմբերին ԱՄՆ նախորդ վարչակազմը Թուրքիայի դեմ պատժամիջոցներ էր սահմանել Ս-400-ների գնման պատճառով: