Հայաստան ինտերնետ մատակարարող վրացական ընկերությունն անցավ Ադրբեջանին

Caucasus Online ընկերության սեփականատեր Խվիչա Մակացարիան ադրբեջանական «Նեքսոլ Հոլդինգին» է վաճառել ընկերության մնացած 51% բաժնետոմսերը։ Գործարքը կնքվել է մի քանի օր առաջ, և արդյունքում Caucasus Online ընկերության 100%  բաժնետեր է դարձել ադրբեջանցի գործարար Նասիբ Հասանովը, գրում է Lragir.am-ը։

Տարածաշրջանի հիմնական ինտերնետ մալուխի վաճառքի պատմությունը, որից օգտվում է նաև Հայաստանը, մեծ աղմուկ էր առաջացրել անցած տարի։ Այն ժամանակ հայտարարվել էր, որ հաջողվել է կանգնեցնել գործընթացը և թույլ չտալ ադրբեջանա-թուրքական ընկերություններին տիրանալ տարածաշրջանի ինտերնետին։ Հավանաբար, Արցախյան պատերազմից ու Վրաստանի և Ադրբեջանի «նոր» հարաբերություններից հետո հաջողվել է գործարքը հասցնել ավարտին։

Թբիլիսին գոհ չէ այդ գործարքից, սակայն, ըստ երևույթին, արդեն չի կարող ոչինչ անել Թուրքիայի և Ադրբեջանի տնտեսական էքսպանսիայի դեմ։ Թբիլիսին համոզվեց, որ Ադրբեջանին աջակցելը Արցախյան պատերազմի ժամանակ չի պաշտպանել Վրաստանին էքսպանսիայից։

Գործարքը համաձայնեցված չէր Վրաստանի կոմունիկացիաների հանձնաժողովի հետ։ Հետևաբար, հանձնաժողովը Հասանովին համարում է Caucasus Online-ի ապօրինի սեփականատեր։

2008 թվականից Caucasus Online ընկերությունը Սև ծովի հատակով անցնող 1200 կմ երկարությամբ օպտիկամանրաթելային մալուխի միակ սեփականատերն է։ Այդ մալուխի օգնությամբ իրականացվում է ինտերնետի տարանցում Եվրոպայից դեպի Հարավային Կովկաս և Կասպից տարածաշրջան։ Caucasus Online -ը ինտերնետ է մատակարարում ոչ միայն Վրաստան, այլ նաև Հայաստան, Ադրբեջանի մեծ մասը, ինչպես նաև Իրանի և Իրաքի որոշ հատվածներ։

Caucasus Online-ի 49%-ը անցել է ադրբեջանական ընկերությանը 2019 թվականին։ Այն ժամանակ վերահսկող մարմինը մի քանի անգամ պահանջել էր վերադարձնել ընկերության բաժնեմասը սկզբնական դիրքին և նույնիսկ տուգանքներ նշանակել։ Անցած տարի ամռանը հանձնաժողովը ընկերությունում հատուկ կառավարիչ է նշանակել, սակայն կառավարչի լիազորությունները ժամանակավորապես կասեցվել են դատարանի կողմից։

«Ներկայիս դրությամբ Հասանովը Caucasus Online-ի 100% բաժնեմասի ապօրինի սեփականատերն է», գրված է կոմունիկացիաների հանձնաժողովի հայտարարության մեջ։

Տարբեր գնահատականների համաձայն, Վրաստանին բաժին է ընկնում Հայաստանի արտաքին ինտերնետային թրաֆիկի շուրջ 80% -ը, Հայաստանը օգտագործում է ևս երկու մալուխ Ռուսաստանում. սևծովյան և ցամաքային։ Թրաֆիկի մոտ 20% -ը բաժին է ընկնում դեպի Իրան մալուխներին։ Ընդ որում, այստեղ հայկական օպերատորները հանդիսանում են որպես ինտերնետի տարանցիկ օղակ դեպի Իրան, Աֆղանստան: