Ռամիլ Սաֆարովի հարցով Եվրախորհրդարանի ընդունած բանաձևը օբյեկտիվ չէ. Ադրբեջանի իշխող կուսակցություն

Ռամիլ Սաֆարովի հարցով Եվրախորհրդարանի ընդունած բանաձևը օբյեկտիվ չէ. հայտարարել է Ադրբեջանում իշխող «Ենի Ադրբեջան» (Միասնական Ադրբեջան) կուսակցության փոխնախագահի պատասխանատու քարտուղար Ալի Մահմեդովը: Նախագահ Իլհամ Ալիևի կողմից Սաֆարովին ներում շնորհելու որոշումը լիովին համապատասխանում է միջազգային կոնվենցիայի դրույթներին և երկրի օրենսդրությանը: Դրանում չկա իրավական նորմերի որևէ խախտում, ընդհակառակը`ամեն ինչ կատարվել է այդ նորմերի շրջանակներում:

«Այն, որ Եվրախորհրդարանն անհանգստացած է տարածաշրջանում լարվածության աճով, շատ գովելի է, սակայն եթե նրա անհանգստությունն անկեղծ լիներ, ապա անցյալ 20 տարիերի ընթացքում նա շոշափելի քայլեր կձեռնարկեր հայ-ադրբեջանական ղարաբաղյան հակամարտության կարգավորման հարցում: Քանի դեռ միջազգային կառույցները, այդ թվում`Եվրախորհրդարանը, ամբողջովին չգիտակցեն դա և քայլեր չձեռնարկեն, տեղի ունեցող ողբերգություններում միշտ առկա կլինի նաև նրանց մեղքի բաժինը: Երեկ ընդունած միակողմանի և ոչ օբյեկտիվ բանաձևին ես մոտենում եմ հենց այդ դիրքերից: Ցավոք, այս բանաձևը կնպաստի Հայաստանի և Ադրբեջանի միջև լարվածության ուժեղացմանը,  ոչ թե նվազեցմանը»,-հայտարարել է Ահմեդովը:

Հինգշաբթի օրը Եվրախորհրդարանը բանաձև է ընդունել Ռամիլ Սաֆարովի արտահանձման և Ադրբեջանի կողմից նրան ներում շնորհելու հարցով: Բանաձևը ցավ է արտահայտում Սաֆարովին հերոսի կոչում շնորհելու հարցի շուրջ և անհանգստություն այն բանի կապակցությամբ, որ դա կարող է Հայաստանի և Ադրբեջանի միջև հարաբերությունների վատթարացման պատճառ դառնալ: