«Թուրքը մեր երեխեքին ավելի լավ կվերաբերվի, քան դուք». անհետ կորած զինծառայողների ծնողները հանդիպել են պատգամավորների հետ

Ազգային ժողովում այսօր՝ մարտի 31–ին, պատգամավորները հանդիպում են ունեցել անհետ կորած զինծառայողների ծնողների հետ։ Հանդիպումից հետո, լրագրողների հետ զրույցում անհետ կորած Դավիթ Ասոյանի մայրն ասաց, թե հոկտեմբերի 10–ից մինչև օրս որևէ տեղեկություն չունի իր որդու մասին, որը  ժամկետային զինծառայող է։

«Թուրքը մեր երեխեքին ավելի լավ կվերաբերվի, քան դուք: Հազար ափսոս մեր երեխեքին, որ ձեր նման անասունների համար գնացել ու դոշ են տվել: Մեր դեպքը միակը չէր, էլի դեպքեր են եղել, որ երեխան հայտնվել է ռազմականում ու անհետացել է: Ես հուսալքված ու հիասթափված եմ էս երկրից: Իմ երեխեն եթե ինձ հասնի՝ ես, ամեն սանտիմետրի վրա թքելով, կգնամ էս երկրից»,- ասաց անհետ կորած Դավիթ Ասոյանի մայրը:

Վերջինս ասաց, որ գնդի հրամանատար Գոռ Իշխանյանին ասել է, թե իր երեխան ողջ է, ինքը արդյոք տեղեկություն ունի, թե որտեղ է իր որդին, սակայն, ի պատասխան, լսել է, թե այդ վաշտից հնարավոր չէր, որ ողջ մնացած զինվոր լիներ. «Ինչի դա պատասխա՞ն է, որ կտան անհետ կորած զինծառայողի մորը: Երեխեքին իրանք դիտավորյալ տվել են թուրքին:  Եթե հողը ամսի 9-ից տվել ես թուրքին, բա ամսի 11-ին մեր երեխեքին խի՞ ես տվել թուրքին»,- ասաց անհետ կորածի մայրը:

«Ես թագավոր տղա եմ տվել բանակին, իսկ բանակը տղայիս տարել է ու կորցրել։ Ի՞նչ սպասելիք ես ունենամ։ Մի երեխայի դին տվել են՝ հուղարկավորել ենք, խոսքը ամուսնուս եղբոր որդու մասին է,  մյուսինը չեն կարողանում գտնել։ Ամսի 20–ին հեռուստացույցով հայտարարեցին, որ Դավիթ Ասոյանին մեդալով պարգևատրել են, նախարարությունից ճշտել ենք, որ իմ երեխայի մասին է խոսքը, բայց երեխայիցս ոչ մի լուր չունենք։ Կամավորը երեխայիս զենքը  հանձնելուց տեսել է, ծանոթների միջոցով ինձ հասել է, որ երեխայիս ռազմականում տեսել են, ո՞ւր տարան երեխայիս՝ չգիտեմ»,– ասաց անհետ կորածի մայրը՝ Լիլիթ Զուռնաչյանը՝ հավելելով. «Բոլորը ղեկավարներ ու գրագետներ են, բայց իրենց ուղեղը դարման է, ես չգիտեմ՝ իրենք ինչով են զբաղված, մենակ աթոռին կպնելով չի, ով կարող է  այս հարցին լուծում տալ, թող գա՝ նստի ղեկավար, ով չի կարող, թող վեր կենա ու ռադը քաշի»։

Ռազմական ոստիկանությունից անհետ կորածի մորը հաստատել են, որ նման դեպք եղել է, բայց այլ զինվորի են ցույց տվել, մինչդեռ, ըստ տիկին Լիլիթի,  կամավորը տեսել էր հենց իր որդուն՝ Դավիթին։

 Անհետ կորածի մայրը այն կարծիքին է, որ իր որդուն թաքցում են։