Հայտնի է, թե ինչ քրեական գործով է Մեղրիի քաղաքապետը Քննչական կոմիտեում

Մեղրիի քաղաքապետ Մխիթար Զաքարյանը հրավիրվել է ՀՀ քննչական կոմիտե՝ խուլիգանության և իշխանության ներկայացուցչի նկատմամբ բռնություն կիրառելու հատկանիշներով հարուցված քրեական գործի շրջանակներում։ Այս մասին ԼՈՒՐԵՐ․com-ը տեղեկացավ Քննչական կոմիտեից։

Փոխանցեցին նաև՝ Զաքարյանի դեմ քրեական գործ է հարուցվել ՀՀ ՔՕ 258 հոդվածի 1-ին և 3-րդ մասերի և 316 հոդվածի 1-ին մասի հատկանիշներով, քրգործն ընդունվել է Քննչական կոմիտե և գտնվում է ՀԿԳ վարչության վարույթում:

Նշենք, որ Սյունիքի մարզում երեկ՝ ապրիլի 21-ին, տեղի ունեցած դեպքերի առնչությամբ հարուցվել է քրեական գործ՝ ՀՀ ՔՕ 258-րդ հոդվածի 3-րդ մասի 1-ին և 2-րդ կետերով (խուլիգանության), 316-րդ հոդվածի 1-ին մասի (իշխանության ներկայացուցչի նկատմամբ բռնություն գործադրելը) հատկանիշներով։ Այս մասին Սյունիքի մարզպետարանում տեղի ունեցած խորհրդակցության ժամանակ վարչապետ Նիկոլ Փաշինյանին զեկուցել էր դատախազ Էդուարդ Հարությունյանը։

Հիշեցնենք, որ երեկ Սյունիքի մարզ այցելած Նիկոլ Փաշինյանին մարզի տարբեր քաղաքներում բնակիչները դիմավորել էին հայհոյանքներով և վիրավորանքերով՝ պահանջելով հեռանալ մարզից։ Քաջարանցիները փակել էին քաղաք մտնող ճանապարհը, այդպիսով Փաշինյանն ընդհանրապես չէր կարողացել Քաջարան մտնել։

Նշենք, որ Փաշինյանի հետ մարզ էին գնացել մեծ թվով  անվտանգության աշխատակիցներ, ոստիկաններ, ԱԱԾ-ի «Ալֆա» ջոկատը, անվտանգության մեծ թվով աշխատակիցներ։