Ես փնտրում եմ այդպիսի մեղադրողի, որ մի օր դեմս կկանգնի. Դավթյանը՝ Մարտի 1-ի գործը տապալելու մասին

Այսօր՝ ապրիլի 30-ին, լրագրողների հետ զրույցում  ՀՀ գլխավոր դատախազ Արթուր Դավթյանը՝ անդրադառնալով ՀՀ երկրորդ նախագահ Ռոբերտ Քոչարյանի և մյուսների գործը տապալելու վերաբերյալ դիտարկմանը, ասաց, «Ես փնտրում եմ այդպիսի մեղադրողի, որ մի օր դեմս կկանգնի։ Բացահայտվածության հատվածով գործն ուղարկվել է դատարան, մնացած մասով ունենք անջատված մաս, որը մինչդատական վարույթում է։ Բացահայտված քրեական գործը մինչդատական վարույթում չի գտնվում»,- նշեց նա՝ հավելելով, որ իրավական տերմինոլոգիա չկա՝ գործը փշրվել, կա ՍԴ որոշում, կա դրա արդյունքում կայացված դատական ակտ, որը վիճարկվել է Վերաքննիչ դատարանում՝ համապատասխան հիմնավորումներով և գործի հեռանկարի հարցով դիմում է ներկայացվել ՍԴ։

Ըստ վերջինիս, եթե հաջողվում է հասնել ՍԴ-ում դիմումի բավարարմանը, ապա հնարավորություն է լինում գործով ամբաստանյալների մեղադրանքները վերաորակելու. «Իսկ եթե չի բավարարվում դիմումը, ապա նշված իրավական ճանապարհով չեն կարող գնալ»,- նշեց նա՝ անդրադառնալով նաև հրաժարական տալուն, որը, ըստ իրեն, ինքնանպատակ չէ. «Ավելին, դա համարում է պատասխանատվությունից խուսափել և կարծում եմ, որ հրաժարական պետք է տալ այն ժամանակ, երբ պաշտոնական պարտականությունները կատարելու համար կան խոչընդոտներ»,- ասաց Արթուր Դավթյանը։

Հիշեցնենք, որ ՀՀ երկրորդ նախագահին և ևս երեք բարձրաստիճան պաշտոնատար անձանց մեղադրանք էր առաջադրվել 2008 թվականի մարտի 1-ի իրադարձությունների համար՝ ՀՀ քրեական օրենսգրքի 300.1-րդ հոդվածով, որը քրեական օրենսգրքում ներմուծվել է ավելի ուշ: