Թուրքական Hurriyet-ն անդրադարձել է Հայաստանում ընթացող ՀԱՊԿ զորավարժություններին

«Երևանը զորավարժությունների նպատակով հյուրընկալել է նախկին ԽՍՀՄ տարբեր երկրներից 2000 զինվորների։ Ռուսաստանը ՀԱՊԿ ղեկավարությամբ Հայաստանում սկսել է մեծամասշտաբ զինավարժություններ, որոնք ընթանում են Սաֆարովին հայրենիք վերադարձնելու արդյունքում Ադրբեջանի հետ Հայաստանի հարաբերությունների վատթարացման և Եվրոպայի հետ Ադրբեջանի մերձեցման ֆոնի վրա»,-գրում է թուքական Hurriyet-ը։

Շուրջ 2000 զինվոր Հայաստանից, Ռուսաստանից, Բելառուսից, Ղազախստանից, Ղրղզստանից և Տաջիկստանից սեպտեմբերի 15-19-ը Հայաստանում կմասնակցի ՀԱՊԿ զորավարժություններին։

«Վերջերս Բաքու այցելած ՆԱՏՕ-ի գլխավոր քարտուղար Ռասմուսենն իր բարձր կարծիքն էր արտահայտել Ադրբեջանի նավթային ռեսուրսների մասին»,-գրում է թուրքական թերթը։ Ըստ թերթի՝ Ռասմուսենը նաև հայտարարել է. «Մեր հարաբերությունները զարգանում են դրականորեն և կայուն։ Ադրբեջանը արժեքավոր դաշնակից է ՆԱՏՕ-ի համար»:

Նշենք, որ Հայաստանի պաշտպանության նախարար Սեյրան Օհանյանն այդ զորավարժություններն անվանել է աննախադեպ Հայաստանի պատմության մեջ, որի նպատակն է ստեղծել հնարավոր սպառնալիքները չեզոքացնող տարածաշրջանային ուժ։