Սյունիքում տեղի ունեցած բողոքի ակցիայից հետո կան բերման ենթարկվածներ. «Մանախը» ձերբակալվել է

Արթուր Այվազյանը` «Մանախը», երեկ Սյունիքի մարզում կազմակերպած բողոքի ակցիայից հետո բերման է ենթարկվել Ոստիկանության Գորիսի բաժանմունք և ձերբակալվել: Գործի շուրջ հարուցվել է քրեական գործ։  Այս մասին ԼՈՒՐԵՐ․com-ի հետ զրույցում ասաց Քննչական կոմիտեի մամուլի քարտուղար Վարդան Թադևոսյանը։

Վերջինս նշեց, որ մայիսի 14-ին՝ ժամը 22։50-ին, ՀՀ քրեական օրենսգրքի 258-րդ հոդվածի 3-րդ մասի 1-ին կետով չթույլատրված արարք կատարելու կասկածանքով Արթուր Այվազյանը ձերբակալվել է․ «Նրա կողմնակից 7 անձանց նկատմամբ որպես խափանման միջոց կիրառվել է ստորագրություն՝ չհեռանալու մասին, վերջիններս, օգտվելով իրենց դատավարական իրավունքից, հրաժարվել են առանց պաշտպանի  ցուցմունք տալ»,- ասաց Վարդան Թադևոսյանը։

Քիչ հետո ՀՀ ոստիկանությունը հայտարարություն տարածեց, որում ասվում է․

«Մայիսի 14-ին, ժամը 15.30-ի սահմաններում, մի խումբ անձինք Սյունիքի մարզի Տեղ գյուղի հատվածում փակել էին Գորիս-Ստեփանակերտ ճանապարհը և 10-15 րոպե կոպիտ կերպով խախտելով հասարակական կարգը՝ քաշքշել էին ճանապարհը բացել պահանջող քաղաքացիներին:
Ժամը 17.47-ին 8 անձ բերման է ենթարկվել ոստիկանության Գորիսի բաժին:
Դեպքի առթիվ հարուցվել է քրեական գործ՝ ՀՀ քրեական օրենսգրքի 258-րդ հոդվածի հատկանիշներով։
Մեկ անձ ձերբակալվել է։ Ձերբակալված 44-ամյա տղամարդը ոստիկանության Գորիսի բաժնում բռունցքով կոտրել է աշխատասենյակներից մեկի պատուհանի ապակին։
Կատարվում է նախաքննություն»,- ասված է հաղորդագրության մեջ։

Հիշեցնենք, որ Արթուր Այվազյանը` «Մանախը», երեկ Սյունիքի մարզում կազմակերպել էր բողոքի ակցիա, որի նպատակը այն էր, որ իշխանությունները զենք տրամադրեն կամավորներին` Սյունիքի սահմանները պաշտպանելու համար: