Պետք է ֆինանսների նախարարին հեռացնեին աշխատանքից. Գործարար

«Սզնի» ՍՊԸ-ի սեփականատեր Գառնիկ Սահակյանը, խոսելով ՀՀ-ում կոռուպցիոն դրսևորումների ու գնումների մասին, օրենքում տեղ գտած «ատկատների» թեմայի շուրջ պատմեց, թե ինչպես է արհեստականորեն իր դեղագործական ընկերությունը դուրս մղվել շուկայից:

Լրագրողների հետ հանդիպմանը Գառնիկ Սահակյանը հայտարարեց, որ իր բիզնեսն արդեն կործանված է Հայաստանում տիրող մենաշնորհային համակարգի պատճառով։ Պարզվում է՝ դեղերի մրցակցության շուկայում գործարարի մրցակիցն է եղել դեղերի ներկրմամբ և իրացմամբ զբաղվող Հայաստանի խոշորագույն ընկերությունը՝ «Նատալի ֆարմ»-ը, որն անբարեխիղճ մրցակցության պայմաններում դեղերի ներկրմամբ զբաղվող «Սզնի» ՍՊԸ-ի սնանկացման հիմք է հանդիսացել։

«Այլևս չեմ կարողանում ներդրումներ իրականացնել: Ես դեղերի շուկայում իմ պայքարն արել եմ, սակայն այսօր բոմժի կարգավիճակում եմ այդ նույն շուկայում, ես տուժել եմ կառավարության մեղքով, պետք է իմ հարցին լուծում գտնեք, 3 միլիարդ 450 միլիոն գողանալու դեպքում՝ 50 միլիոն տուգանքը շատ փոքր բան է: Ցուցադրական տուգանեցին, դա նրա համար փրկություն էր, նա պետք է գնա մատաղ անի»-հավելեց գործարարը։

Անդրադառնալով վերջին շրջանում արված պաշտոնանկություներին՝ վերջինս նկատեց. «Պետք է ֆինանսների նախարարին առաջնահերթ հեռացնեին աշխատանքից, չնայած, եթե անգամ նախագահին փոխենք, բայց համակարգը չփոխենք, միևնույնն է, ոչինչ էլ չի փոխվի»։

Նույն թեմային անդրադառնալով՝ Ստեփան Սաֆարյանն ասաց.«Ինչո՞ւ պետք է սովորական գործարարը 19 տարվա ընթացքում իր գումարը կարողանա հասցնել 200-250 հազար դոլարի, իսկ ինչ-որ մեկն ԱԺ-ում նստած մի քանի տարի մտնի շուկա և դառնա միլիոնատեր»։