Խաղաղությանն այլընտրանք չկա. Ադրբեջանի ԱԳ նախարար

Ադրբեջանի ԱԳ նախարար Էլմար Մամեդյարովը ելույթ է ունեցել ՄԱԿ-ի Գլխավոր ասամբլեայի դահլիճում՝ անդրադառնալով նաև Լեռնային Ղարաբաղի խնդրին:

Լեռնային Ղարաբաղի շրջանի ադրբեջանական և հայկական համայնքները «մի օր ապրելու են ուս ուսի», հայտարարել է Ադրբեջանի արտգործնախարարը, տեղեկացնում է ՄԱԿ-ի լրատվական կենտրոնը:

«Մենք անկեղծորեն հավատում ենք, որ այլընտրանք չկա խաղաղությանը, կայունությանը և փոխադարձ շահավետ տարածաշրջանային համագործակցությանը: Ադրբեջանը վեճի՝ բանակցությունների միջոցով շուտափույթ լուծման ամենաշահագրգռված կողմն է»,-պնդել է Մամեդյարովը:

Իր հայտարարության մեջ Մամեդյարովը նաև անդրադարձել է իր երկրի մասնակցությանը Անվտանգության խորհրդին 2012-2013թ.թ.՝ ընդգծելով իր երկրի կազմակերպած հանդիպումը այսպես կոչված Arria Formula մեխանիզմի հովանու տակ այն ժամանակ, երբ նախագահել է այս 15 անդամ ունեցող մարմնում մայիս ամսին:

Ադրբեջանի ԱԳ նախարարը արտահայտել է Ադրբեջանի անհանգստությունը Մերձավոր Արևելքի խաղաղության գործընթացի շուրջ, որը, նրա խոսքով, «լճացման փուլում է գտնվում», և կոչ արել կողմերին ստեղծել անհրաժեշտ պայմանները, որոնք կաջակցեն բանակցությունների վերսկսմանը:
Ի հավելումն՝ նա նշել է, որ Ադրբեջանը մնում է «խորը անհանգստացած» Սիրիայում բռնության և «սոցիալ-տնտեսական և մարդասիրական իրավիճակի առնչությամբ»: Ասել է նաև, որ անհանգստացած է «լարվածությամբ, որի առիթ է հանդիսացել մահմեդականության դեմ անարգանքը»՝ անուղղակիորեն նկատի ունենալով հակամահմեդական տեսանյութը: