Սաֆարովը կամաց-կամաց կարգավորում է կյանքը. Ադրբեջանի հերոսն ամուսնանում է

Ռամիլ Սաֆարովը պատրաստվում է ընտանիք կազմել, տեղեկացնում է ադրբեջանական 1news.az գործակալությունը, որին էլ տեղեկացրել են Ադրբեջանի հերոսի հարազատները: Նրա ընտրյալն է Շեբնեմ Մահմեդովան, ով սպասել է նրան այս տարիների ընթացքում: Սպայի հորից ճշտված տեղեկատվության համաձայն՝ պսակադրության արարողությունը դեռևս չի կայացել, չնայած որ մինչ այդ շշուկներ էին տարածվել, որ արդեն կայացել է: Նախապատրաստությունները տեղի են ունենում այդ ուրախալի իրադարձության համար, հայտնում է 1news.az-ը:

Հիշեցնենք, որ 2004 թվականի փետրվարի 19-ին Բուդապեշտում ադրբեջանցի ոճրագործ սպա Ռամիլ Սաֆարովը կացնահարեց Հայաստանի ԶՈւ սպա Գուրգեն Մարգարյանին քնած ժամանակ: Սպաները Հունգարիայի մայրաքաղաքում մասնակցում էին անգլերեն լեզվի դասընթացներին ՆԱՏՕ-ի «Գործընկերություն հանուն խաղաղության» (Peace for Partnership) ծրագրի շրջանակներում: Հունգարիայի դատարանը դատապարտեց Ռամիլ Սաֆարովին ցմահ բանտարկության առանց ներման իրավունքի առաջին 30 տարիներին: Ադրբեջանի «հերոս» ճանաչված մարդասպանն արժանացել է նաև մայորի կոչման, բնակարանի ու նյութական փոխհատուցման: