Ո՞ւմ է ընտրել ջավախահայությունը

Վրաստանում կայացած խորհրդարանական ընտրությունների համատեքստում բավականին ուշագրավ վիճակագրություն է գրանցվել Ջավախքում։ «Բազմազգ Վրաստան» կազմակերպության ղեկավար Առնոլդ Ստեփանյանը Lurer.com–ի հետ զրույցում հայտնեց, որ նախնական տվյալների համաձայն՝ ջավախահայության մեծամասնությունն իր ձայնը տվել է Վրաստանի նախագահ Միխեիլ Սաակաշվիլու գլխավորած «Միացյալ ազգային շարժում» կուսակցությանը:

Մեր զրուցակիցն ակտիվ մասնակցություն է ցուցաբերել Վրաստանի խորհրդարանական ընտրություններին՝ հետևելով դրանց ընթացքին հենց Ջավախքում։ Առնոլդ Ստեփանյանի ունեցած նախնական տվյալներով՝ Ջավախքի բնակչության շուրջ 80 տոկոսն իր ձայնը տվել է իշխող «Միացյալ ազգային շարժում» կուսակցությանը, իսկ միլիարդատեր Բիձինա Իվանիշվիլու ղեկավարած «Վրացական երազանքը» ստացել է ձայների 12-13 տոկոսը։

P.S. Ի դեպ, նշենք նաև, որ, ըստ մամուլում շրջանառվող լուրերի, ԱԺ ՀՀԿ–ական պատգամավոր Վարդան Այվազյանը, որն ի դեպ ծնունդով Ջավախքից է, իր թիմակիցների հետ միասին մեկնել էր Վրաստան՝ Սաակաշվիլու ղեկավարած կուսակցությանն աջակցելու նպատակով։