Ֆիլիպ Գորդոն. «ԱՄՆ-ը եւ Ռուսաստանը սերտորեն համագործակցում են Կովկասում խաղաղություն հաստատելու հարցում»

Միացյալ Նահանգները և Ռուսաստանը սերտորեն համագործակցում են Կովկասում խաղաղություն հաստատելու գործում։ Այս մասին հայտարարել է ԱՄՆ պետքարտուղարի Եվրոպայի եւ Եվրասիայի հարցերով տեղակալ Ֆիլիպ Գորդոնը՝  ԱՄՆ Սենատի արտաքին հարաբերությունների հանձնաժողովում «Միացյալ նահանգներ – Ռուսաստան հարաբերություններ» թեմայով Կոնգրեսի լսումների ժամանակ։ Այս մասին հաղորդում է «Regnum» լրատվական գործակալությունը՝ հղում անելով ԱՊԱ գործակալությանը։

«ԵԱՀԿ Մինսկի խմբի համանախագահները՝ Միացյալ Նահանգները, Ռուսաստանը և Ֆրանսիան սերտորեն համագործակցում են` փորձելով բանակցությունների միջոցով հասնել Ղարաբաղյան հակամարտության խաղաղ կարգավորմանը», - ասել է Գորդոնը։

Պետքարտուղարի օգնականը նշել է, որ ԱՄՆ-ը և Ռուսաստանը արտաքին քաղաքական որոշ հարցերում ունեն տարբեր տեսակետներ. «Մեր կառավարությունները (ԱՄՆ–ի և Ռուսաստանի) տարբեր դիրքորոշումներ ունեն Սիրիայում տիրող իրավիճակի հետ կապված։ Մենք սկզբունքորեն դժգոհ ենք Վրաստանի հետ կապված խնդրի շուրջ։ Միացյալ Նահանգները լրջորեն աջակցում է Վրաստանին ինքնիշխանության եւ տարածքային ամբողջականության հարցերում։ Եվ մենք հետեւողականորեն ենք մոտենում ռուս–վրացական հակամարտությանը՝ շարունակելով բարձրացնել 2008թ–ին կնքված հրադադարի ռեժիմի պահանջները Ռուսաստանի կողմից կատարելու հարցում»։