«Վրաստանի՝ ՆԱՏՕ մտնելու ցանկությունը վերածվում է Վրաստանում թուրքական էքսպանսիայի». փորձագետ

Այսօր Թուրքիայի կողմից Վրաստանին 1.7 մլն դոլարի անհատույց զինամթերք փոխանցելու մասին խոսեցին «Միտք» վերլուծական կենտրոնի փորձագետ Վահե Սարգսյանն ու ռազմական փորձագետ Արծրուն Հովհաննիսյանը։

Հովհաննիսյանն ասաց, որ Թուրքիա-Վրաստան ռազմական համագործակցությունը նոր չի սկսվել, և Վրաստանը Թուրքիային է ընտրել որպես ռազմական գործընկեր՝ այդ ճանապարհով փորձելով հեշտացնել իր մուտքը ՆԱՏՕ։ «Թուրքական բանակը մինչև հարավօսական պատերազմը միլիոնավոր դոլարների անհատույց ռազմամթերք է տրամադրել Վրաստանին, իսկ պատերազմից հետո 200 միավոր զրահամեքենաներ է տվել, թուրք զինվորականները ուսուցանում են վրացական բանակը, սակայն թուրքական բանակը ՆԱՏՕ-ում լավագույնը չէ»,- նշեց նա։

Փորձագետը նաև ասաց, որ ՆԱՏՕ մտնելու Վրաստանի ցանկությունը նման գործելակերպի արդյունքում վերածվում է թուրքական էքսպանսիայի։

«ՀՀ-ն իր ռազմական գործընկերներին այդքան մեծ PR չի անում, որովհետև մենք փաստացի պատերազմական իրավիճակում գտնվող պետություն ենք, բացի այդ՝ առանձնապես PR անելու տեղ էլ չկա։ Բայց այնպիսի տեղեկություններ, որոնք շատ են հետաքրքրում լրագրողներին՝ կապված ՀՀ ռազմական համագործակցությունների հետ, չենք կարող հրապարակել՝ ելնելով թեկուզ հենց այն իրավիճակից, որում մեր երկիրը գտնվում է»,- եզրափակեց իր խոսքը փորձագետը։