Reuters. Ադրբեջանը սպառնում է նոր պատերազմով. Սերժ Սարգսյան

ՀՀ նախագահ Սերժ Սարգսյանը մեղադրել է Ադրբեջանին նոր պատերազմի սպառնալիք ստեղծելու համար՝ գրում է Reuters-ը:

Ադրբեջանը կուտակում է «անընդունելի չափերի հասնող» զինամթերք՝ նախապատրաստվելով պատերազմի վերսկսմանը, հայտնել է Սերժ Սարգսյանը՝ Reuters-ին տված հարցազրույցում: Սարգսյանի խոսքերով՝ Հայաստանը ցանկանում է հակամարտությունը կարգավորել բանակցությունների միջոցով, ինչին հասնելու համար ՀՀ–ն ոչ մի ջանք չի խնայի:

«Այժմ՝ նույնիսկ զինադադարի գոյության պայմաններում, Ադրբեջանը սպառնում է մեզ նոր պատերազմով»,- նշել է Սարգսյանը:

Լեռնային Ղարաբաղի շփման գոտում լարվածության բարձրացման հաճախակի դեպքեր են գրանցվում՝ պատերազմի վտանգ առաջացնելով մի տարածաշրջանում, որտեղ Թուրքիան, Ռուսաստանը և Իրանը հետապնդում են սեփական շահերը:

«Երբ ես ասում եմ, որ ատելություն կա հայերի նկատմամբ Ադրբեջանում, երբ ես ասում եմ, որ Ադրբեջանում զենք–զինամթերքի վտանգավոր չափերի կուտակումներ կան, երբ ես ասում եմ, որ Ադրբեջանը պատրաստվում է վերսկսել պատերազմական գործողությունները և հակամարտությունը լուծել ռազմական ճանապարհով, դա բնավ չի նշանակում, որ բանակցությունները շարունակելու կարիք չկա», - ընգծել է Հայաստանի նախագահը:

Reuters-ը մատնանշում է այն հանգամանքը, որ երկու երկրների միջև լարվածությունն աճել է Հունգարիայի կողմից հայ սպային կացնահարած մարդասպանին Ադրբեջանին արտահանձնելուց հետո, ինչից հետո Իլհամ Ալիևը ներում է շնորհել մարդասպանին նրա վերադառնալուն պես՝ արժանացնելով հերոսի կոչման:

Ադրբեջանը հայտարարել է, որ Ալիևը գործել է օրենքի համաձայն՝ անտեսելով միջազգային քննադատությունն այս հարցի շուրջ:

Reuters–ի փոխանցմամբ՝ կուտակելով նավթից եկած հասույթը՝ Բաքուն ավելացրել է ռազմական ծախսերը վերջին տարիներին, սակայն չի ընդունում այն մեղադրանքները, թե ինքն ագրեսոր է ԼՂ հակամարտությունում, որի անջատումն Ադրբեջանից չի ճանաչվել միջազգայնորեն՝ ԽՍՀՄ-ի փլուզումից մինչև օրս: