Իրանի նկատմամբ միջազգային բանաձևերը հանգեցրին երկրում հումանիտար դրության վատթարացմանը. Բան Կի Մուն

Ուրբաթ օրը ՄԱԿ-ի գլխավոր քարտուղար Բան Կի Մունը զեկույց է հրապարակել, որի մեջ ասվում է, որ Իրանի նկատմամբ միջազգային բանաձևերի ընդունումն է հանգեցրել երկում դրության ապակայունացմանը. գրում է ИТАР-ТАСС-ը:

Իրանի դեմ գործում է ՄԱԿ-ի ԱԽ-ի բանաձևերի փաթեթը, բացի այդ՝ երկրի նկատմամբ տնտեսական միակողմանի ճնշում են իրականացնում ԱՄՆ-ը և ԵՄ-ը: Ենթադրվում է, որ այս պատժամիջոցները կստիպեն Իրանին համագործակցել ՄԱԳԱՏԷ-ի(Միջուկային էներգիայի միջազգային գործակալության) հետ և ապացուցել իր միջուկային ծրագրի խաղաղ բնույթը:

«Բանաձևերն ապացուցեցին բնակչության բոլոր խավերի վրա ունեցած իրենց բացասական ազդեցությունը՝ հանգեցնելով սղաճին, հումքի և էլեկտրաէներգիայի գների բարձրացմանը, ինչպես նաև՝ առաջին անհրաժեշտության մթերքների, այդ թվում՝  դեղորայքի պակասին»,-մեջբերել է գլխավոր քարտուղարը։

Նրա խոսքերով՝ դա ազդում է նաև երկրում իրականացվող հումանիտար գործողությունների վրա՝ դժվարացնելով բեռնափոխադրումը դեպի Իրան: «Նույնիսկ այն ընկերությունները, որոնք դեղորայքի ներկրման թույլտվություն են ստացել, բարդությունների առաջ են կանգնում՝ ստիպված լինելով վճարումներ կատարելու համար բանկեր փնտրել «երրորդ աշխարհի» երկրներում, ինչի արդյունքում մի շարք դեղագործական ընկերություններ դադարեցրել են իրենց արտադրանքը արտահանել Իրան»,-նշել է Բան Կի Մունը:

Միաժամանակ, Իրանի Իսլամական Հանրապետությունում հումանիտար դրության բարելավում դեռ չի նկատվում: Ավելին, սպասվում է, որ ԵՄ-ն հոկտեմբերի 15-ին կարող է դադարեցրել իրանական գազի ներմուծումը, ինչը զգալիորեն կկրճատի երկրի եկամուտները: