Ամերիկացի փորձագետ. Իրանի վրա հարձակումը կբարդացնի ղարաբաղյան հակամարտության կարգավորման գործընթացը

Caucasian Review of International Affairs պարբերականի նախկին ավագ խմբագիր Ալեքս Ջեքսոնը 1news.az-ին տված հարցազրույցում, պատասխանելով լրագրողի հարցին՝ կարող է Իրանի վրա հնարավոր հարձակումն ազդել Հարավային Կովկասում հակամարտությունների կարգավորման գործընթացի վրա, մասնավորապես նշել է. «Իրանի շուրջ իրավիճակի սրումը կարող է բացասական ազդեցություն ունենալ տարածաշրջանում հակամարտութունների կարգավորման գործընթացի վրա։

Թեև լարվածությունը կամ հնարավոր հարձակումն Իրանի վրա դժվար թե հանգեցնի նոր պատերազմի, այնուամենայնիվ, այս ամենը կբարդացնի կարգավորման ձեռքբերման գործընթացը, օրինակ՝ ղարաբաղյան հակամարտության։ Կողմերից և ոչ մեկը պատրաստ չի լինի փոխզիջման, և Իրանն առավել հակված կլինի պահպանել լավ հարաբերություններ տարածաշրջանային գործընկերների հետ, ինչպիսին է Հայաստանը։ Ռուսաստանը կշարունակի օգտագործել իր ազդեցությունը Հայաստանում ստատուս-քվոյի պահպանման համար, քանի որ խուսափում է իրավիճակի հետագա ապակայունացումից»։