Մինչև ազգային օրակարգով ուրիշներին «վարակելը»՝ վարակողը պետք է «վարակված» լինի դրանով․ Վրթանեսյան

Տեղեկատվական անվտանգության փորձագետ Կարեն Վրթանեսյանը ֆեյսբուքյան էջում գրում է․

«Հաճախ եմ լսում փաստարկ, թե ազգային օրակարգն իրեն սպառել է, և իշխանափոխության հիմքում պետք է սոցիալական բողոքը լինի։

Ես չեմ պնդում, որ ազգային հարցերը հուզում են Հայաստանի բնակչության թեկուզ 80 տոկոսին, կամ նույնիսկ 60-ին [թեպետ վստահ եմ, որ ճիշտ տեղեկատվական և իրազեկման աշխատանքներով կարելի է այդ 60 տոկոսին էլ հասնել և ազգային հարցերը դարձնել իրենց համար եթե ոչ առաջնահերթ, բայց գոնե որոշ չափով կարևոր]։

Այնուամենայնիվ ես պնդում եմ, որ ազգային ուժերն այսօր չեն կարողանում օրակարգեր / ասելիք ձևավորել և հասնել հայաստանաբնակ հայերի նույնիսկ այն 5–15–25 տոկոսին, որոնք պատրաստ են ազգային օրակարգի շուրջ համախմբվել։

Խնդիրը գուցե ազգային այն էլիտաներն են, որոնք պետք է ու կարող էին ազգային օրակարգերը ստեղծեին, բայց իրենք էլ են մոլորված, չեն կարողանում կողմնորոշվել ներկայիս անորոշության պայմաններում և, ի վերջո, արդեն չեն էլ հավատում, որ հնարավոր կլինի երբևէ վերականգնել 42 հազար քառակուսի կիլոմետր տարածքով Հայաստանը և կառուցել այդ սահմաններում հնարավորինս ինքնիշխան ազգային պետություն։

Գուցե դա չէ խնդիրը, չգիտեմ, կամ գուցե խնդիրներից միայն մեկն է։ Եթե ավելի հիմնավոր վարկածներ առաջարկեք, շնորհակալ կլինեմ։

Բայց անվիճելի է, որ մինչև ազգային օրակարգով ուրիշներին «վարակելը», վարակողը պետք է ինքը «վարակված» լինի դրանով, այսինքն՝ ի սրտե հավատա իր առաջ քաշած օրակարգին։

Հ.Գ. Ի դեպ, սոցիալական օրակարգը նույնպես տապալվելու է, երբ հարուստ մարդը փորձելու է աղքատին համոզել, որ վերջինիս սոցիալական խնդիրներն այլևս անտանելի են, եթե խոսակցությունից հետո նստելու է 40 հազար դոլարանոց ավտոմեքենա ու վերադառնա գիշերելու Երևանի կենտրոնում գտնվող իր թանկարժեք բնակարան»։