«ՀայաՔվե» օրենսդրական նախաձեռնությունը հիմնականում համարժեք ընկալում ունեցավ մեր հանրության մեջ․ Դանիելյան

«ՀայաՔվե» օրենսդրական նախաձեռնությունը հիմնականում համարժեք ընկալում ունեցավ մեր հանրության մեջ, վստահ ենք, որ շարունակությունը էլ ավելի ողջունելի կլինի։ Այս մասին ֆեյսբուքում գրել է Իրավագիտության դոկտոր, արդարադատության նախկին նախարար Գևորգ Դանիելյանը․

«Շնորհակալություն ինչպես մեզ վստահող համակիրներին, այնպես էլ սուր հարցադրումներով մեզ դիմողներին, այդ թվում՝ մտահոգություններով քննադատողներին։ Մենք չենք կարող մեր ժողովրդի մեջ հերթական անջրպետումները թույլ տալ, ազգային անվտանգությունը ջլատող բաժանարար գծեր քաշել և դժգոհել մեզ հետ անհամաձայնություն հայտնողներից։ Խորհրդանշական է, որ այս նախաձեռնության հեղինակը «Համախմբում» շարժումն է։ Մեր միակ խնդրանքն այն է, որ մեր Երկրում նույնությամբ չկրկնեն և չտարածվեն զուտ ադրբեջանական «մտավախությունները»։

Շնորհավորելով Երկրի Սահմանադրության օրվա և պետական խորհրդանիշների առթիվ, կամենում եմ ընդգծել, որ իր տեսակի մեջ բացարձակ ժողովրդավարության նոր նշաձող երաշխավորող «ՀայաՔվեն» ԵԶԱԿԻ է։ Ավելին, այն եզակի է միջազգային փորձի տեսանկյունից, քանզի օրենսդրությամբ սահմանված ստորագրության այսպիսի բարձր քվոտաներ չեք հանդիպի որևէ երկրում։ Իշխանությունները սա պետք է հստակ գիտակցեն։

Սիրելի հայրենակիցներ, այս նախաձեռնությունը կոչված է իրավական պաշտպանության տակ առնելու երկու մեծագույն արժեք՝ Արցախի անկախությունը և Հայոց ցեղասպանությունը։ Ինչ վերաբերում է պատերազմին, այն ինքնին ոչ միայն պատերազմ չի բերում, այլև համախմբում է ուժերին, ինչն էլ պատերազմը կանխելու միակ միջոցն է։ Թշնամուն սթափեցնում է ոչ թե ստորագրված թուղթը, այլ ազգի համախմբումը, միասնական կամքը։

Հ.Գ. Արցախի խորհրդարանական բոլոր ուժերը միաձայն հայտարարությամբ ողջունել են «ՀայաՔվե» օրենսդրական նախաձեռնությունը, նրանք դեմ են կորցնելու արյամբ ձեռք բերած անկախությունը ...»