REGNUM. Իրանը պատրաստ է Ղարաբաղյան խնդրի հետ կապված լուծումներ առաջարկել

REGNUM լրատվականը, հղում անելով Tehran Times-ին, հաղորդում է, որ Իրանի ԱԳ նախարարության մամլո խոսնակ Ռամին Մեհմանպարաստը հոկտեմբերի 14-ին Կազանում կայացած մամլո ասուլիսի ժամանակ հայտարարել է, որ եթե Ադրբեջանը և Հայաստանը ցանկություն արտահայտեն, ապա Իրանը պատրաստ է Ղարաբաղյան հակամարտության կարգավորման հարցի շուրջ լուծումներ առաջարկել:

«Հարևան երկրների միջև սովորաբար առաջանում են սահմանային վեճեր, սակայն տարածաշրջանում գտնվող մյուս երկրները ցանկանում են օգտագործել նման հակամարտությունները՝ միջամտելով տարածաշրջանային կոնֆլիկտներին», - ասել է Իրանի ԱԳ նախարարության մամլո խոսնակը: Վերջինս ընդգծել է, որ Իրանը մշտապես աջակցում է բանակցությունների շարունակմանը և պատրաստ է Բաքվի և Երևանի միջև առկա տարածքային վեճը խաղաղ բանակցությունների միջոցով կարգավորելու լուծումներ առաջարկել:

«Արևմուտքը համաշխարհային լրատվամիջոցները օգտագործում է որպես լավագույն զենք' աղավաղելով մահմեդական ժողովուրդների մասին ճշմարտությունը: Եվ այս հարցում Իրանը և Ռուսաստանը կարող են նշանակալի դեր խաղալ տարածաշրջանում ուժերի հավասարակշռությունը պահպանելու համար», - ասել է Իրանի ԱԳՆ մամլո խոսնակը Թաթարստանի Պետական խորհրդի նախագահի հետ հանդիպման ժամանակ:

Վերջինս ավելացրել է, որ ներկա աշխարհաքաղաքական բարդ իրավիճակում շատ կարևոր է սերտացնել Թաթարստանի ու Իրանի միջև հարաբերությունները և երկուստեք օգտագործեն իրենց հսկայական ներուժը փոխադարձ համագործակցությունը խորացնելու համար: