Իշխանությունը գործ է կարում փոխգնդապետի սպանության գործով ցուցմունք տված 3 զինծառայողի վրա. պատգամավոր

Փաստացի իշխանությունը ոչ միայն փորձում է մաքրել սպայի սպանության գործով անցնող իշխանական շայկային, այլ նոր քրեական գործերով փորձում է ճնշել այն սպաներին, ովքեր ոչ միայն փորձել են կանխել փոխգնդապետ Մխիթարյանի սպանությունը, այլ չվախենալով իշխանության ստորություններից, իրենց ցուցմունքներով հաստատել են բոլոր այն անձանց շրջանակը, որոնք տարբեր մասնակցություն են ունեցել ողբերգական միջադեպի օրը: Այս մասին իր ֆեյսբուքյան էջում գրել էԱԺ «Պատիվ ունեմ» խմբակցության պատգամավոր Տիգրան Աբրահամյանը՝ անդրադառնալով դաժան ծեծի հետեւանքով 3 տարուց ավելի կոմայի մեջ մնացած եւ օրերս մահացած փոխգնդապետ  Արա Մխիթարյանի գործին:

«Այն, որ այս իշխանությունների լկտիությունները սահմաններ չեն ճանաչում, բոլորն արդեն գիտեն:

4 տարի կոմայի մեջ գտնվող, զինված ուժերի փոխգնդապետ Արա Մխիթարյանի մահանալուց մեկ շաբաթ անց, քննչական կոմիտեն պաշտոնապես տեղեկացնում է, որ 3 սպայի նկատմամբ սուտ մատնությամբ նախաքննությունն ավարտվել է:

Հիշեցնեմ, որ մամուլով և Մխիթարյանի հարազատների ու համածառայակիցների պնդմամբ, ԶՈւ փոխգնդապետ Արա Մխիթարյանի նկատմամբ հարձակմանը մասնակցել է քպ Վայոց ձորի նախկին մարզպետն (ներկայումս պատգամավոր) ու նրա շրջապատը:

Փաստացի իշխանությունը ոչ միայն փորձում է մաքրել սպայի սպանության գործով անցնող իշխանական շայկային, այլ նոր քրեական գործերով փորձում է ճնշել այն սպաներին, ովքեր ոչ միայն փորձել են կանխել փոխգնդապետ Մխիթարյանի սպանությունը, այլ չվախենալով իշխանության ստորություններից, իրենց ցուցմունքներով հաստատել են բոլոր այն անձանց շրջանակը, որոնք տարբեր մասնակցություն են ունեցել ողբերգական միջադեպի օրը:

Այս 4 տարիների ընթացքում իշխանությունը ամեն միջոցի դիմել է իր հետ առնչություն ունեցող անձանց հանցագործների շրջանակից դուրս բերելու համար, իսկ հիմա էլ գործ է կարում 3 զինծառայողի վրա»:

Հիշեցնենք, որ նախօրեին քննչական կոմիտեն հայտարարել էր, որ ավարտվել է ՀՀ ԶՈՒ սպա Արա Մխիթարյանին Եղեգնաձոր քաղաքում գլխի շրջանում ծանր մարմնական վնասվածք հասցնելու վերաբերյալ քրեական գործով երեք անձանց կողմից սուտ մատնություն կատարելու վերաբերյալ քրեական վարույթի նախաքննությունը։

Նշենք, որ ամիսներ առաջ էլ ԱԺ ՔՊ-ական պատգամավոր Տրդատ Սարգսյանը գլխավոր դատախազին հենց այս գործով բողոքեց, թե ինչու չեն պատժվում սուտ ցուցմունք տված անձիք: Ըստ ականատեսների դեպքի վայրում է եղել նաեւ Տրդատ Սարգսյանը, որը այդ ժամանակ Վայոց Ձորի մարզպետ էր եւ հրաժարական տվեց այդ միջադեպից հետո:  Չնայած ականատեսների ցուցմունքների՝ այդպես էլ Տրդատ Սարգսյանի այնտեղ գտնվելու փաստը քննչական կոմիտեն չհաստատեց: