Ադրբեջանի վարչակարգն իր թուլությունները վերագրում է Հայաստանին

Ադրբեջանական «Նյուզ Ազ» լրատվամիջոցի հրապարակման համաձայն՝ ԱՀ ԱԳ նախարարության մամլո քարտուղար Էլման Աբդուլլաևը, մեկնաբանելով Հայաստանի Անվտանգության խորհրդի քարտուղար Արթուր Բաղդասարյանի խոսքերը, ըստ որի՝ ադրբեջանական կողմը հանդես է գալիս ռազմատենչ հայտարարություններով, նշել է, որ, ի տարբերություն Ադրբեջանի Հանրապետության, հայկական կողմն է, որ պարբերաբար շարունակում է վարել իսկական ռազմատենչ քաղաքականություն։

Ըստ մամլո խոսնակի՝ «Եթե հայկական պետության պաշտոնատար անձինք, անցկացնելով ինչ որ հանդիպումներ, փորձում են իրենց սփոփել և ստել սեփական ժողովրդին, ապա հավաստիացնում եմ Հայաստանի ղեկավարությանը, որ իրականում ոչ մի կերպ հնարավոր չէ արդարացնել Ադրբեջանի Հանրապետության տարածքների բռնազավթումը»։ Է. Աբդուլլաևի խոսքերով՝ Հայաստանը, ժամանակ չկորցնելով, պետք է սկսի Ադրբեջանի բռնազավթված տարածքներից իր զինված ուժերի դուրս բերումը։

Ամփոփելով նշյալ անձի սուբյեկտիվ գնահատականը՝ կարելի է ընդգծել, որ ադրբեջանական կողմը փորձում է երկրի արտաքին քաղաքականության մարտավարությունում առկա սխալները և թուլությունները վերագրել հայկական կողմին՝ այդ կերպ վարչակարգի ձախողումները կրկին  արդարացնելով ՀՀ պետության դիրքորոշման միջոցով:

Հարկ է նշել, որ ներքին սպառման համար նախատեսված այդ միջոցառումներն այլևս հստակ արձագանք չեն ստանում միջազգային հանրության կողմից: