«Սիրով կընդունեմ աջակցության ցանկացած օրինական ձեւ». Ստյոպա Սաֆարյան

«Ժառանգություն» կուսակցության գլխավոր քարտուղար, թիվ 1 ընտրատարածքում առաջադրված պատգամավորի թեկնածու Ստյոպա Սաֆարյանը facebook-ի իր էջում գրել է.

«Սիրելի ու հարգելի ընկերներ,

Ինչպես գիտեք' «Ժառանգություն» կուսակցության կողմից իմ թեկնածությունն առաջադրվել է թիվ 1 ընտրատարածքի ԱԺ պատգամավորի լրացուցիչ ընտրություններում: Համաձայն ԿԸՀ սահմանած ժամանակացույցի՝ նախընտրական քարոզարշավը սկսվում է նոյեմբերի 4-ից (կիրակի): Թեպետ, ցավոք, մինչ այժմ ԶԼՄ-ներում արդեն փաստեր ու ահազանգեր են հրապարակվել, որ ՀՀԿ թեկնածուն ոչ միայն ժամանակից շուտ է սկսել իր քարոզարշավը, այլեւ դրանում ներգրավել է հանրային ռեսուրսներ՝ քարոզչական միջոցառումներ ունենալով դպրոցներում, մանկապարտեզներում, թաղապետարաններում:

Դժբախտաբար, սա նորություն չէ հայաստանյան ընտրական պրակտիկայում, ի սկզբանե սպասելի է եղել իմ համար եւ ամենեւին չի վախեցրել ինձ առաջադրվելու որոշում կայացնելիս: Չի վախեցրել. որովհետեւ ինձ ուժեղ եմ զգացել նախկին ընտրություններում ընտրողների տված տպավորիչ քվեից, ընտրատարածքի բնակիչների զորակցող խոսքերից ու իմ հնարավոր հաղթանակում ներդրում ունենալու բազմաթիվ ընկերների ու ծանոթների պատրաստակամությունից:

Խորապես կարեւորելով ամեն մարդու ներդրումը, ես սիրով կընդունեմ աջակցության ու մասնակցության ցանկացած օրինական ձեւ: Նրանք, ովքեր պատրաստ են իրենց ժամանակը, մասնագիտական ու այլ կարողությունները, ռեսուրսները կամ դրանց մի մասը ներդնել իմ ընտրապայքարում, միայն շնորհակալ կլինեմ:

Քարոզարշավում որեւէ կերպ ներգրավվելու կամ օգտակար լինելու համար կարող եք արձագանքել թե այս կոչիս ներքո, թե ֆեյսբուքյան մասնավոր հաղորդագրություններով, թե էլեկտրոնային նամակներով (էլ. փոստ՝ [email protected]), եւ թե նաեւ իմ շտաբ այցելելով, որը կբացվի երկուշաբթի օրվանից: Շտաբը կգործի Գայի պողոտա 8, բն. 1բ հասցեում՝ Գայի արձանի հարեւանությամբ, նախկին «Մանկական աշխարհ» հանրախանութի տարածքում: Հեռախոսահամարն է՝ 67-42-61:

Նախընտրական հիմնադրամի հաշվեհամարը կհրապարակեմ երկուշաբթի օրը եւ երախտապարտ կլինեմ ցանկացած չափի աջակցության համար:

Խորին հարգանքներով՝ ԱԺ պատգամավորի թեկնածու Ստյոպա (Ստեփան) Սաֆարյան»: