Նիկոլ Փաշինյան. Ինչո՞ւ չի բացահայտվում Մարտի 1-ը

2008–ի Մարտի 1-ին և 2–ին տեղի ունեցած դեպքերի կապակցությամբ ՀՀ ԱԺ ՀԱԿ խմբակցությունը միջնորդություն է ներկայացրել ՀՀ ԱԺ ժամանակավոր հանձնաժողով ստեղծելու համար, իսկ փաստաթուղթը հիմնավորվում է մի շարք կետերով: 

Լուրեր.com–ը զրուցեց ԱԺ ՀԱԿ խմբակցության պատգամավոր Նիկոլ Փաշինյանի հետ,պարզելու` Մարտի 1–ի գործով նոր բացահայտումներ կա՞ն, թե՞՝ ոչ, և որո՞նք են լինելու ՀԱԿ–ի առաջիկա քայլերը։

«Մարտի 1-ի բացահայտման գործընթացն այնտեղ է, որտեղ 2008–ին էր։ Ես ուզում եմ հիշեցնել, որ նախաքննության մարմինը շատ դժվարությամբ զոհերին, կամ առնվազն զոհերի մեծ մասին, որպես տուժող ներգրավեց գործում։ Նրանց, որպես տուժող չէին ցանկանում ներգրավել։ Իսկ ինչո՞ւ չէին ուզում, որովհետև գործը վարում էին իշխանությունները, ովքեր այդ սպանություններն իրականացրել էին։ Եթե այդ զոհերին ճանաչեին որպես տուժող, արդեն կանխավարկածով պետք է ընդունեին, որ նրանք սպանվել են ապօրինի գործողությունների արդյունքում, բայց նրանք ի սկզբանե ցանկանում էին հիմքում դնել վարկած, որ սպանվել են օրինական գործողության արդյունքում»,– ասաց Փաշինյանը։

ՀԱԿ պատգամավորի խոսքով, եթե ուսումնասիրենք ՀՔԾ–ի վերջին զեկույցը, կտեսնենք, որ նրանք զոհերի գործողությունների մեջ փորձում են զոհերին վարկաբեկող տեղեկություններ մտցնել։

«Փորձ են անում ցույց տալ, որ զոհերը ինչ–որ ապօրինի գործողություններ են ձեռնարկել։ Այսինքն, այս կանխավարկածից իշխանությունը դեռ չի հրաժարվել, այդ պատճառով Մարտի 1–ի գործը չի բացահայտվում»,– ասաց վերջինս։

Փաշինյանը նշեց նաև, որ Մարտի 1–ի տասը սպանություններից 3-ի բացահայտումը որևէ բարդություն չի ներկայացնում.

«Մենք գիտենք ոստիկանության զորքերում ծառայող այն անձանց անուն–ազգանունները, ովքեր այդ օրը կիրառել են «Չերյոմուխա 7» տեսակի զենք, և մեղավոր են երեք քաղաքացիների մահվան համար։ Մարդիկ հայտնի են, բայց գործը չի բացահայտվում»,– նկատում է ՀԱԿ պատգամավորը։

Անդրադառնալով ՀԱԿ–ի առաջիկա քայլերին Փաշինյանը տեղեկացրեց, որ ՀԱԿ–ը  շրջանառության մեջ է դրել Մարտի 1–ի հետ կապված որոշման նախագիծ, որի հիմնական իմաստն ու նպատակը հետևյալն է՝ ձևավորել խորհրդարանական հանձնաժողով, որը կուսումնասիրի Մարտի 1-ի սպանությունների բացահայտմամբ զբաղվող և զբաղված պաշտոնական անձանց գործողությունների օրինականությունը։

«Մենք ասել ենք, որ հետևողական ենք լինելու Մարտի 1–ի սպանությունների բացահայտման գործում, բայց պետք է հասկանանք նաև, որ գործող իշխանությունը շահագրգիռ է, որ այդ սպանությունները չբացահայտվեն։ Ըստ էության` ճիշտ են Մարտի 1–ի զոհերի հարազատներից մի քանիսի ձևակերպումները, թե Հայստանում քանի դեռ գործում է այս իշխանությունը, սպանությունները չեն բացահայտվի։ Եթե այդպես չէ, ուրեմն գործող իշխանությունները թող դա ապացուցեն»,– եզրափակեց Նիկոլ Փաշինյանը։

Գայանե Համբարձումյան