Թուրքիայում ռումբի պայթյունի հետևանքով երեխա է զոհվել

Թուրքիայի հարավ-արևելքում` Շեմդինլի քաղաքում, ականավորված մեքենայի պայթյունի հետևանքով զոհվել է 11-ամյա երեխա. հաղորդում է BBC-ն։ Թուրքիայի վարչապետ Ռեջեփ Թայիփ Էրդողանը պատասխանատվությունը պայթյունի համար դրել է քրդական անջատողականների վրա։ Վարչապետի խոսքերով՝ պայթյունն ուղղված է տեղական ոստիկանության զրահամեքենային, սակայն մոտակայքում հարսանիք էր տեղի ունենում։ Բացի զոհված երեխայից՝ 18 մարդ վնասվածք է ստացել։

Նշենք, որ Շեմդինլին գտնվում է Թուրքիայի՝ Իրանի և Իրաքի հետ սահմանից քիչ հեռու։ Այս շրջանում հաճախ են տեղի ունենում բախումներ անջատողականների և Թուրքիայի պաշտպանության ուժերի միջև։ Սակայն մինչև հիմա որևէ խմբավորում իր վրա չի վերցրել պայթյունի պատասխանատվությունը։ Էրդողանը վստահություն է հայտնել, որ դա «Քրդական աշխատավորական կուսակցության» անջատողականների ձեռքի գործն է։

Հիշեցնենք, որ «Քրդական աշխատավորական կուսակցություն»-ը զինված պայքար է մղում քրդական հանրապետության ստեղծման համար արդեն25 տարի։ Այս պայքարի շրջանակներում կուսակցության զինյալները հարձակումներ են իրականցրել Թուրքիայի ռազմական օբյեկտների վրա, ինչպես նաև ռումբերի պայթյուններ են իրականցրել թուրքական քաղաքներում։ Ընդհանուր առմամբ՝ այս հակամարտության ընթացքում զոհվել է ավելի քան 40 հազար մարդ։