Սիրիական ընդդիմության ներսում տարաձայնություններ չկան. ՍԱԽ ներկայացուցիչ

Սիրիայում ընդդիմության կարևոր համակարգող մարմնի՝ Սիրիական ազգային խորհրդի պաշտոնական ներկայացուցիչ Ուսամա Մունաջեդը երկուշաբթի օրը հերքել է Քաթարում սիրիական ընդդիմադիրների հանդիպման ընթացքում ընդդիմության շարքերում առկա լուրջ տարաձայնությունների մասին լուրերը։ Հանդիպման ընթացքում քննարկվում է միասնական ճակատի ստեղծման հնարավորությունը։ Մունաջեդը հայտնել է BBC-ին, որ բանակցությունները Քաթարում չեն նվազեցնի Սիրիական ազգային խորհրդի նշանակությունը, որին շատ հաճախ քննադատում են իր ներսում գաղափարական տարաձայնությունների առկայության համար։

Հիշեցնենք, որ ավելի վաղ սիրիացի ընդդիմադիր առաջնորդներից մեկը՝ խորհրդարանի նախկին պատգամավոր Ռիադ Սեյֆը, հայտարարել էր, որ ձեռք է բերել միջազգային աջակցություն սիրիացի ընդդիմադիրների ղեկավարման համար 50-հոգանոց խմբի ստեղծման համար։ Կահիրեում հուլիս ամսին կայացած նախորդ համագումարի ժամանակ ընդդիմության կառավարման միասնական մարմին ստեղծել չհաջողվեց։