Ադրբեջանում ԱՄՆ-ի դեսպանին թույլ չեն տվել այցելել հայկական հնագույն գերեզմանոց

Ադրբեջանում ԱՄՆ-ի դեսպան Ռիչարդ Մորնինգսթարը հանդես է եկել հայտարարությամբ տարածաշրջանում մշակութային ժառանգության պաշտպանության հարցով։ Հայտարարության մեջ մասնավորապես նշվում է, որ Ադրբեջանում դեսպանի պաշտոնում նշանակվելուց հետո Մորնինգսթարը սկսել է ծանոթանալ երկրի մշակույթի և պատմության հետ։ Տարածաշրջանը բարդ պատմություն ունի, և ղարաբաղյան հակամարտությունը պատճառ է դարձել հազարավոր մարդկանց մահվան, լրջորեն ազդել է կարևոր կրոնական և մշակութային նշանակություն ունեցող վայրերի վրա։ «Այցելելով Նախիջևան՝ ես պաշտոնական անձանց հետ քննարկել եմ Ջուլֆայում հայկական հնագույն գերեզմանոցի քանդման հարցը։ Ցավում եմ, որ պաշտոնական անձինք անհնար են դարձրել իմ այցելությունն այս վայր՝ պատճառաբանելով արգելքն անվտանգության նկատառումներով»,-նշված է հայտարարության մեջ։ Տարածաշրջանի մշակութային ժառանգության պահպանությունը կարևոր է տարածաշրջանի հետագա խաղաղության համար։ Հակամարտության ընթացքում ոչնչացվել են մեծ թվով հուշարձաններ։

ԱՄՆ-ն աջակցում է Հայաստանին և Ադրբեջանին երկու երկրների պատմական արխիվների պահպանության հարցում։ Օրինակ՝ գալիք շաբաթ ԱՄՆ-ում կգտնվեն Ադրբեջանի և Հայաստանի արխիվարիուսները։ Համատեղ ծրագրի շրջանակներում նրանք կմասնակցեն դասընթացների նյութական-մշակութային ժառանգության մասին գիտելիքների մակարդակի բարձրացման համար։

«Նման պայմանները գովելի են, մենք ապագայում ևս պատրաստ ենք աջակցել նման ջանքերին»,-նշվում է Մորնինգսթարի հայտարարության մեջ։