Այս թեման փակված է. Ես լավագույնն եմ մաղթում «Ազատ դեմոկրատներին». Րաֆֆի Հովհաննիսյան

Նախորդ ասուլիսի ընթացքում «Ժառանգություն» կուսակցության առաջնորդ Րաֆֆի Հովհաննիսյանը հայտարարել էր, որ առաջադրում է իր թեկնածությունն առաջիկա նախագահական ընտրություններում։ Հովհաննիսյանը խոստացել էր լրագրողների հարցերին պատասխանել այսօր։

Անդրադառնալով լրագրողներից մեկի այն հարցին, որ «Ազատ Դեմոկրատներ»-ն իրենց օրակարգում չեն ներառում առաջիկա ընտրություններում Հովհաննիսյանին սատարելը, արդյոք դա իրեն չի՞ վիրավորում, և ի՞նչ հույսերով է գնում ընտրություններին, եթե անգամ իրենց հետ դաշինք համարվող կուսակցությունն իրեն չի սատարելու, Հովհաննիսյանն ասաց. «Մերը դաշինք չէր։ Մենք գնացինք ԱԺ «Ժառանգություն» կուսակցության ցուցակով, որը ներառում էր երիտասարդներ, մտավորականներ։ Իմ համոզմամբ՝ ազատ և արդար ընտրությունների դեպքում մենք ավելի մեծ ներկայացուցչություն կունենայինք խորհրդարանում, բայց այսօր էլ մենք մեր կողմից առաջադրված թվով քիչ, բայց շատ լավ պատգամավորներ ունենք։ Այն հայտարարությունը, որ ես արել էի հոկտեմբերի կեսերին, իմ բնավորությանը համապատասխան չէ։ Ես չեմ սիրում անձնավորել որևէ բան, բայց այն, ինչ գրված էր այդ հայտարարության մեջ, դա ամենամեղմն ու նվազագույնն էր»։

Հովհաննիսյանը նշեց նաև, որ, այնուամենայնիվ, շատ գոհ լինելով համատեղ պայքարելու եղանակից՝ կային անձնական, բարոյական պարտականություններ, որոնք չկատարվեցին.

«Եթե որևէ մեկը կարծում է, որ նախընտրական շրջանում վախենալով կլռեմ ստի դեմ, ո՛չ։ Առհասարակ, յուրաքանչյուր համաձայնություն ձեռք բերելուց հետո, հայացք կիսելուց հետո, ասվում է՝ թեման փակված է։ Հիմա ես եմ ասում՝ այս թեման փակված է։ Ես լավագույնն եմ մաղթում «Ազատ դեմոկրատներին» և երիտասարդներին։ Թող մեղքերի աղբյուրը յուրաքանչյուրն իր մեջ գտնի։ Բայց ասեմ նաև՝ ես վիրավորված չեմ, դա իրենց որոշումն է։ Ես որևէ մեկի սատարումը չեմ հայցել, այն քաղաքացիական ակտիվիստները, ովքեր ուզում են մաս կազմել հավաքական պայքարի, ես պատրաստ եմ նրանց հետ միասին անցնել այդ ճանապարհը»,–եզրափակեց Հովհաննիսյանը։