Հոգևորականը բորդելո՞ւմ

Հայտնի է դարձել, որ Մայր Աթոռի հյուրընկալության բաժնի պատասխանատու Սենիկ Մխիթարյանի` Սամվել աբեղայի նկատմամբ կաթողիկոսի կարգադրությամբ կարգապահական վարույթ է սկսվել: Պատճառը սեպտեմբերի 8-ին հիշյալ անձնավորության կողմից Արցախի ՊԲ սպա Հմայակ Հակոբյանին ծեծի ենթարկելն է: Պաշտոնական այս հաղորդագրության մեջ, սակայն, աչքի է ընկնում և հետաքրքրություն առաջացնում մի նյուանս. ծեծը տեղի է ունեցել Նոր Նորքում գտնվող «Բելի դոմ» կոչվող հյուրանոցային համալիրում: Իսկ հետաքրքիր է այս փաստը հենց նրանով, որ հիշյալ «Բելի դոմ» կոչեցյալ հյուրանոցային համալիրն իրականում էժանագին մոթել-բորդել է, իսկ այդպիսիք, ինչպես հայտնի է, որոշակի՝ խիստ սպեցիֆիկ ֆունկցիա են կատարում մեզանում:

Իհարկե, ծեծի փաստը, ավելին, հոգևորականի կողմից զինվորականին ծեծի ենթարկելու հանգամանքը ևս պարսավանքի և կարգապահական վարույթի արժանի մի բան է, սակայն կատարվածի, դրա հաշվով կիրառվելիք պատժի վերաբերյալ այս ամբողջ հաղորդագրության մեջ ուշագրավը երևի թե այն է, թե ինչ էր անում հոգևորականը տղամարդ-որձերի որոշակի կարիքների բավարարման համար նախատեսված հաստատությունում: Այս առումով նաև հասկանալի է դառնում, թե ինչը կարող էր լինել կռվի առիթ («պատճառը եղել է նեղ ընտանեկան հարցերի շուրջ»,-ասված է հաղորդագրության մեջ). եթե հոգևորականն ու զինվորականը բորդել են գնացել միայն մեկ կնոջ հետ, հնարավոր է, որ վեճը ծագած լինի «որսը» կիսել չկարողանալու պատճառով, եթե երկու, ապա, Աստված գիտե, թե ինչ չեն կարողացել կիսել տաքացած որձերը:

Ամբողջ խայտառակությամբ հանդերձ, որը չի կարող շրջանցել նաև սրբության սրբոց Էջմիածինը, իրականությունն այն է, որ նմանատիպ մոթել-բորդելներն այսօրվա Հայաստանում ամենամեծ պահանջարկ վայելող հաստատություններն են, և այս առումով երևի թե չարժե նաև զարմանալ, որ դրանց մշտական հաճախորդների թվում քիչ տոկոս չկազմեն նաև հոգևորականները: Իսկ սա արդեն իսկապես մի բան է, որ առաջին հերթին պիտի մտահոգի Նորին Սուրբ Օծությանը:

Լուսինե Կեսոյան