Ծաղր ժողովրդի նկատմամբ. Արամ Մանուկյան

Կառավարության կողմից կոռուպցիայի դեմ պայքարի հռչակումը ծաղր է ժողովրդի նկատմամբ, ձեռառնելիք քաղաքական ուժերի և մարդկանց հանդեպ: Այս մասին այսօր լրագրողների հետ հանդիպմանն ասաց «Հայ ազգային կոնգրես» խորհրդարանական խմբակցության քարտուղար, ՀՀՇ վարչության նախագահ Արամ Մանուկյանը:

«Տասը տարի առաջ Հայաստանը կոռուպցիայի գծով գտնվում էր 75-րդ տեղում, հիմա բարձրացել է, և այս իշխանությունների համառ ջանքերի շնորհիվ մենք գրավում ենք 129-րդ տեղը: Կոռուպցիան ամեն տեղ է, բոլորիս վրա ենք զգում, բոլոր համակարգերում է, և իրենց թվում է, թե փորձում են խաբել եվրոպացիներին, որ Հայաստանում կոռուպցիայի դեմ պայքարի գործընթաց կա: Ես շատ հաճախ եմ շփվում եվրոպացիների հետ, և ոչ մեկը չի հավատում»,-նշեց Մանուկյանը:

ՀՀՇ վարչության ղեկավարը նշեց նաև, որ ՀՀՇ-ի երտասարդական կազմակերպությունը դարձավ Եվրոպայի երիտասարդ լիբերալների լիիրավ անդամ: «Մենք դրանով ամփոփեցինք շրջանը. ՀՀՇ-ն այսուհետև երեք միջազգային կառույցների լիիրավ անդամ է: Դա ես համարում եմ իմ և իմ կուսակցության, իմ բոլոր քաղաքական գործընկերների լրջագույն հաջողությունը։ Ոչ միայն Հայաստանում, այլև Հարավային Կովկասում չկա երկրորդ նմանատիպ կուսակցություն, որը լինի այսքան շատ միջազգային կառույցների անդամ: Դա Հայաստանի ազատական քաղաքականության, ազատական գաղափարախոսության տարածման առումով լրջագույն քայլ է»,-նշեց Արամ Մանուկյանը:

Վերջինս կարևոր համարեց նաև օրեր առաջ Տիգրան Առաքելյանի դատավարության ժամանակ ակցիային քաղաքական ուժերի երիտասարդական թևերի մասնակցությունը: