Ստյոպա Սաֆարյան. Թիվ 1 ընտրատարածքում խախտումներն արդեն առկա են

Թիվ 1 ընտրատարածքում դեկտեմբերի 2-ին կայանալիք Ազգային ժողովի մեծամասնական ընտրակարգով պատգամավորի թեկնածու, «Ժառանգության» վարչության քարտուղար Ստյոպա Սաֆարյանը դեռ չի սկսել իր քարոզարշավը։ Այս մասին Լուրեր.com-ի հետ զրույցում ասաց ինքը՝ Սաֆարյանը։

«Քարոզարշավի պաշտոնական մեկնարկի մասին կհայտարարեմ, բայց, իհրակե, քանի որ արդեն իսկ սկսվել է քարոզարշավը, անշուշտ, հանդիպումներ և նախապատրաստական աշխատանքներ կատարվում են։ Առաջիկայում կհստակեցվի բակային հանդիպումների և քարոզչական նյութերի տարածման ժամանակացույցը, որից հետո կմեկնարկեն բոլոր աշխատանքնեը։ Այս պահին շտաբն ուղղակի իր նախապատրաստական վերջին աշխատանքների փուլում է»,-նշեց Սաֆարյանը։

Հաշվի առնելով, որ իշխող կուսակցությունն ունի իր թեկնածուն, «Ժառանգության» ներկայացուցիչն իրեն մրցակից է համարում ՀՀԿ թեկնածուին։ «Հաշվի առնելով, որ վարչական լծակներն արդեն իսկ գործադրվում են նրա քարոզարշավում, կարելի է ենթադրել, որ անկախ ճանաչվածությունից, անկախ հանրության մեջ իր ներգրավվածության հանգամանքների, միևնույնն է, նա կարող է հույս ունենալ ստանալ լուրջ քվե։ Թեպետ չեմ ուզում թերագնահատել նաև իմ մյուս բոլոր մրցակիցների շանսերը, հավասարապես՝ նաև իմ շանսերը, որոնց հավատալով է, որ մասնակցում եմ ընտրություններին»,-ասաց Ստյոպա Սաֆարյանը։

Այն հարցին, թե իշխանության թեկնածուի կողմից արդեն օգտագործվում են վարչական լծակներ, թե՝ ոչ, Սաֆարյանն ասաց.

«Ես մամուլից տեղեկացա (թեպետ նաև, ըստ էության, բնակիչներն էին նախկինում ասում), անգամ մինչև առաջադրումը, մինչև նույնիսկ ՀՀԿ-ի կողմից հայտարարություն անելը, մարդիկ այցելում էին բնակարաններ և հորդորում առաջիկայում քվեարկել այդ թեկնածուի օգտին, այսինքն՝ դա նույնիսկ մինչև առաջադրվելն էր։ Մամուլից տեղեկացանք նաև, որ որոշ դպրոցներում, մանկապարտեզներում անց են կացվում միջոցառումներ, որոնք ուղեկցվում են քարոզչությամբ օգուտ այդ թեկնածուի, ընդ որում, դա կարող է արվել նաև քարոզարշավի մեկնարկից հետո, բայց փաստն այն է, որ արդեն իսկ ընտրական օրենսգրքի խախտումներն առկա են»,-ասաց «Ժառանգության ներկայացուցիչը։

Հիշեցնենք, որ դեկտեմբերի երկուսին կանցկացվեն Ազգային ժողովի մեծամասնական ընտրակարգով ընտրություններ Հայաստանի թիվ 1 և թիվ 35 ընտրատարածքներում։

Նախընտրական քարոզարշավը մեկնարկել է նոյեմբերի 4-ին և կավարտվի նոյեմբերի 30-ին։