Guardian. ԱՄՆ-ի 3 նահանգում մտադիր են օրինականացնել մարիխուանան

Չորեքշաբթի օրվանից Վաշինգտոնում, Օրեգոնեում և Կոլորադոյում չի բացառվում, որ կթույլատրվի մարիխուանա ծխել։ Երեք նահանգների բնակիչները պատրաստվում են «ոչ» ասել թմրանյութերի դեմ պայքարին և թույլ տալ մարիխուանայի օգտագործումը ոչ բժշկական նպատակներով, այլ հանգստի, ուժերի վերականգման և հաճույք ստանալու համար։ Վաղը վաշինգտոնցիներին, կոլորադցիներին և օրեգոնցիներին, որոնք կգան ընտրատեղամասեր, կտրամադրեն քվեաթերթիկներ, որոնց վրա, բացի նախագահի թեկնածուների անուններից, ներկայացված կլինի նաև մարիխուանայի լեգալիզացման հարցը։ Եթե այս առաջարկությանը կողմ լինի այս նահանգների բնակիչների կեսից ավելին, ապա 21 տարեկանից կարելի կլինի ունենալ և օգտագործել մարիխուանայի փոքր քանակություն (30 գրամից քիչ ավել)։

Ճիշտ է, ծխել փողոցում և այլ հասարակական վայրերում առաջվա նման կարգելվի։ ԱՄՆ-ի արդարադատության նախարարությունում արդեն հայտարարել են, որ «այո» ասել մարիխուանային վաղվա հանրաքվեի ժամանակ կնշանակի չենթարկվել դաշնային օրենքներին և ազգային ծրագրին, որն ուղղված է թմրանյութերի դեմ պայքարին, ինչի վրա կառավարությունը յուրաքանչյուր տարի ծախսում է մինչև 44 մլրդ դոլար։ Ի դեպ, մարիխուանայի օգտագործումն այս նահանգներում բուժման նպատակով արդեն օրինականացված է, չնայած որ դա հակասում է դաշնային օրենքներին. գրում է Guardian-ը։