Der Spiegel. Վիտալի Կլիչկոն պահանջում է Յանուկովիչի հրաժարականը

Վերջին լուրեր 5 Նոյեմբեր, 2012 20:20

Հազարավոր ուկրաինացիներ են փողոց դուրս եկել Կիևում՝ բողոքելով խորհրդարանական ընտրությունների արդյունքների դեմ: Ընդդիմադիր քաղաքական գործիչ, հայտնի բռնցքամարտիկ Վիտալի Կլիչկոն պահանջում է նախագահ Յանկուկովիչի հրաժարականը:

Երկուշաբթի օրը Ուկրաինայի մայրաքաղաք Կիևում 2000 մարդ է փողոց դուրս եկել՝ ԿԸՀ-ին մեղադրելով խորհրդարանական ընտրությունների արդյուքները կեղծելու մեջ: Երեք ընդդիմադիր կուսակցությունները բողոքի կոչ են անում՝ չնայած նրան, որ մինչև նոյեմբերի 12-ը Կիևում արգելվել է ցույցերի կազմակերպումը:

Կենտրոնական ընտրական հանձնաժողովի շենքի առջև ընդդիմադիր Արսենի Յացենյուկը հայտարարել է. «Վերջին 8 օրերի ընթացքում իշխող կուսակցությունը գողացել է ուկրաինացիների ձայները և փոխել ընտրությունների արդյունքը իրենց թեկնածուների օգտին: Դրանում Ռեգիոնների կուսակցության ղեկավար նախագահ Յանուկովիչը անձամբ պատասխանատվություն է կրում»: Իր հայտարարության մեջ «Բատկիվշչինա» կուսակցության առաջնորդ, ընդդիմադիր Յուլիա Տիմոշենկոն հայտարարել է, որ չի ճանաչում հոկտեմբերի 28-ին կայացած խորհրդարանական ընտրությունների արդյունքները, և որ իշխանությունները պետք է անմիջապես դադարեցնեն կեղծումները: Վիտալի Կլիչկոն, որի «Ուդար» կուսակցությունը նույնպես մասնակցել է ցույցերին, պահանջել է Յանուկովիչի հրաժարականը և նոր ընտրությունների անցկացում: ԿԸՀ-ի շենքի առջև նա կոչ է արել իր կուսակիցներին չճանաչել հոկտեմբերի վերջին կայացած ընտրությունների արդյունքները:
«Մենք չենք կարող ընդունել քվեների հաշվարկի ժամանակ տեղի ունեցած այդ կեղծումները: Մենք կարիք ունենք խորհրդարանական և նախագահական ընտրությունների»,-հայտարարել է Կլիչկոն:

«Սվոբոդա» կուսակցության ղեկավար Օլեգ Տյագնիբոկը հայտարարել է, որ կառավարությունը թքում է ուկրաինացիների ընտրության վրա:
Հիշեցնենք, որ Ուկրաինայում խորհրդարանական ընտրությունների համամասնական ցուցակներով 99,94% արդյունքների ամփոփումից հետո իշխող «Ռեգիոնների կուսակցություն»-ը հավաքել է 30,01%: Երկրոդ տեղում է ընդդիմությունը. «Բատկիվշչինան» հավաքել է 25,53%, իսկ երրորդ տեղը զբաղեցնում է բռնցքամարտի աշխարհի չեմպիոն Վիտալի Կլիչկոյի «Ուդար» կուսակցությունը՝ 13,96%-ով, ասված է Ուկրաինայի ԿԸՀ-ի հայտարարության մեջ: