Երբ քաղաքացին նվաճում է իր իրավունքները

Այսօր Բնապահպանության նախարար Արամ Հարությունյանի գլխավորությամբ «Խոսրովի Անտառ» պետական արգելոցի «Խոսրովի» տեղամասի այցելուների կենտրոնում պետք է տեղի ունենար խորհրդակցություն, որի ժամանակ պետք է քննարկվեին պահպանվող տարածքների մասին օրենսդրության բարելավման, արգելոցի պահպանման ռեժիմն իրականացնող աշխատակազմի մասնագիտական վերապատրաստման և տեխնիկական վերազինման, ֆինանսական միջոցների համալրման և արդյունավետ օգտագործման, կադրային համալրման, համայնքային իրազեկման, անվտանգ էկոտուրիզմի զարգացման հետ կապված հարցեր, ինչպես նաև «Խոսրովի անտառ» պետական արգելոց մուտքի էլեկտրոնային թույլտվություններ ստանալու կարգի մշակման, «Խոսրովի անտառ»-ի վարչական սահմաններին տեսախցիկների տեղադրման և էկոպարեկային խմբերի ստեղծման աշխատանքների կարգի մշակման հարցերը:

Վերը նշված խորհրդակցությանը հրավիրված են եղել ոլորտին աջակցող միջազգային կազմակերպությունների, ԳԱԱ ոլորտային ինստիտուտների և բուհերի ներկայացուցիչներ, սակայն բնապահպանական ոչ մի նախաձեռնություն հրավիրված չի եղել:

Ինչպես արդեն գիտենք, վերջին շրջանում քաղաքացիական, մասնավորապես բնապահպան-ակտիվիստներին ըստ էության չի հետաքրքրում, թե պետական կառույցները ինչն են ճիշտ գտնում, ինչը՝ ոչ: Նրանք իրենց վրա են վերցրել և՛ վերահսկողի, և՛ հետաքննողի, և՛ որոշում կայացնողի դերը: Այս դեպքում էլ նրանք հայտնեցին «խորհրդակցությանը մասնակցելու իրենց ցանկության մասին»՝ փակելով արգելոց ուղևորվող մեքենաների ճանապարհը: Այս ամենի հետևանքով որոշակի քաշքշուք է առաջացել ոստիկանների, բնապահպանության նախարարության աշխատակիցների և բնապահպանների միջև: Այս ամենը հարթվել է, երբ կատարվել է նրանց պահանջը այն մասին, որ իրենք էլ պետք է մասնակցեն քննարկմանը:

Սակայն բնապահպանության նախարար Արամ Հարությունյանը ակտիվիստներից միայն 2-ին է թույլ տվել մասնակցել խորհրդակցությանը, ինչին ի պատասխան բոլոր 12 ակտիվիստները ներխուժել են խորհրդակցական սենյակ և չլսելով նախարարի հորդորներին դուրս չեն եկել: Նախարարը հաշտվել է այն մտքի հետ, որ խորհրդակցությունը  շարունակվի նրանց ներկայությամբ: