ՀՀ ատոմակայանի շուրջ թուրքական հիստերիան շարունակվում է

Համաձայն ԱՄՆ-ում գործող Usazeris network ադրբեջանական լոբբիստական կառույցի տարածած հայտարարության՝ վերջիններս պատրաստվում են ստորագրահավաք կազմակերպել ՀՀ-ում Մեծամորի ատոմակայանը փակելու դեմ: Նման միջնորդությամբ է հանդես եկել նաև ԱՄՆ-ում գործող «Թուրք-ադրբեջանական համայնք» կառույցը: Հարկ է նշել, որ վերջիններս փաստարկում են, որ ՀՀ-ում գործող ԱԷԿ-ը լուրջ վտանգ է ներկայացնում տարածաշրջանի երկրների համար, և որ ԱԷՄԳ-ի միջազգային գործակալության կողմից այն ենթակա է խիստ վերստուգման՝ բացառելու տարածաշրջանում առկա սպառնալիքը:

Ուշագրավ է, որ դեռևս նախորդ տարի նման նախաձեռնությամբ էր հանդես եկել Թուրքիայի Հանրապետությունում գործող TURKSAM կառույցը, որի ղեկավարն է Սինան Օղանը: Վերջինս ծագումով Իգդիրից է և նախկինում հարել է Թուրքիայի ազգայնական խմբավորումներին: Հատկանշական է, որ վերջինս 2011թ.-ին Թուրքիայում կայացած խորհրդարանական ընտրություններում պատգամավոր ընտրվելուց հետո բավականին մեղմացրեց ՀՀ ԱԷԿ-ի մասով իր հակահայ քաղաքականությունն ու հիստերիկ դրսևորումները:

Հարկ է նշել, որ Սինան Օղանը Թուրքիայի խորհրդարանում է հայտնվել թուրքական MHP՝ «Ազգայնական շարժում» կուսակցության մանդատով, որը համարվում է թուրքական ծայրահեղ ազգայնական կուսակցություն, որի միջոցով համակարգվում են Թուրքիայի Հանրապետության «Գորշ գայլեր» ծայրահեղական խմբավորումները: