Խարդախության զոհ է դարձել Երևան քաղաքի առաջին ատյանի դատարանի առաջատար մասնագետը. նրանից կորզել են 1 մլն դրամ

Shamshyan.com-ի տեղեկություններով՝ ՀՀ Ներքին գործերի նախարարության Ոստիկանության Մալաթիայի բաժնում փաստաթղթեր են ձևակերպվել, որոնք փոխանցվել են Հայաստանի Քննչական կոմիտեի Երևան քաղաքի քննչական վարչության Մալաթիայի քննչական բաժին:

Սեպտեմբերի 21-ին Մալաթիայի ոստիկանություն է դիմել Երևանի բնակիչ Անի Մ.-ն և հայտնել, որ սեպտեմբերի 18-ին «WhatsApp» հավելվածի միջոցով «Հայէկոնոմբանկ»-ի անվտանգության աշխատակից ներկայացած իրեն անծանոթ անձի ուղղորդմամբ ստացված հաղորդագրությամբ քառանիշ ծածկագիրը փոխանցել է իրեն, որից հետո ինքը հաղորդագրություն է ստացել, որ իր անվամբ ձևակերպվել է 1 մլն դրամի վարկ, որը հետո փոխանցվել է մեկ այլ հաշվի:

Ոստիկանությունը ձեռնարկում է միջոցառումներ «Հայէկոնոմբանկի» անվտանգության աշխատակից ներկայացած անձի ինքնությունը պարզելու, նրան հայտնաբերելու ուղղությամբ:

Գ. Շամշյանի տեղեկություններով՝ Անի Մ.-ն ոստիկաններին և քննիչներին հայտնել է, որ ինքը աշխատում է Երևան քաղաքի առաջին ատյանի դատարանում՝ որպես առաջատար մասնագետ: