Վերջին օրերին Սիրիայում սպանվել են տասնյակ մարդիկ, այդ թվում՝ խորհրդարանի խոսնակի եղբայրը. ԶԼՄ-ներ

Սիրիացի ապստամբները պնդում են, որ վերջին օրերի ընթացքում կառավարական զորքերի հետ մարտական բախումների ընթացքում զոհվել են տասնյակ մարդիկ. փոխանցում է BBC-ն:

Նվազագույնը տաս մարդ է սպանվել Դամասկոսում տեղի ունեցած պայթյունի արդյունքում: Մեկ մարդ զոհվել է մայրաքաղաքի արվարձաններից մեկում, որը մեծ մասամբ բնակեցված է ալավիներով, որոնց էլ հենց պատկանում է Բաշար Ասադը:

Դամասկոսում սպանվել է նաև խորհրդարանի խոսնակի եղբայրը՝ Մուհամմեդ ալ Լահամը: Նրա վրա հարձակումը կազմակերպել են քաղաք ներխուժած ահաբեկիչները. հայտնել է «Սիրիա» կառավարական հեռուստաընկերությունը:

Ըստ «SANA» լրատվական գործակալության՝ խորհրդարանի խոսնակ Ջիհադ Լահամի եղբայր Մոհամմեդ Օսաման Լահամը սպանվել է երեքշաբթի առավոտյան Դամասկոսում աշխատանքի ուղևորվելիս:

Սիրիայի ակտիվիստների խմբերի համաձայն՝ ինքնասպանի կողմից իրականացված հարձակման հետևանքով երկուշաբթի օրը զոհվել է Սիրիայի կառավարական ուժերի 50 զինծառայող:

Մեծ Բրիտանիայից իր գործունեությունն իրականացնող «Սիրիայում մարդու իրավունքների դիտակետ» կազմակերպությունն ավելի վաղ հայտնել էր, որ երկուշաբթի օրը ծանր մարտեր են ընթացել Դամասկոսի Թադամոն և Յարմուկ շրջաններում: Վերջինս գտնվում է պաղեստինցի փախստականների ճամբարներից մեկի մոտակայքում: Պաղեստինցի և Սիրիայի պաշտոնական աղբյուրների համաձայն՝ 24 ժամվա ընթացքում զոհվել է ավելի քան 30 մարդ: Ակտիվիստների համաձայն՝ կառավարական օդուժը հարվածներ էր հասցրել նաև Իդլիբ նահանգում, որոնց պատճառով զոհվել է առնվազն 20 ապստամբ:

Սիրիայում ապստամբությունը շարունակվում է արդեն մոտ 20 ամիս: Տարբեր գնահատականների համաձայն՝ հակամարտությունը մոտ 36 հազար զոհի պատճառ է դարձել: