ԵՄ-ն շարունակում է աջակցությունը ՀՀ արդարադատության ոլորտին

Այսօր՝ նոյեմբերի 7-ին, Հայաստանի Հանրապետությունում ԵՄ պատվիրակությունը և ՀՀ Արդարադատության նախարարությունը ներկայացրին ԵՄ աջակցությամբ իրականացված արդարադատության ոլորտին  վերաբերվող ծրագրերի արդյունքները։ ՀՀ-ում ԵՄ պատվիրակության ղեկավար Տրայա Հրիսթեանի առաջին տեղակալ Օննո Սիմոնսը իր խոսքում նշեց. «ԵՄ աջակցությունն արդարադատության ոլորտին ներառում է բյուջետային աջակցություն Հայաստանին, ինչպես նաև տեխնիկական օժանդակության միջոցառումներ մոտ տասնութ միլիոն եվրո արժողությամբ, Եվրոպայի խորհրդի հետ համատեղ ծրագիր մոտ չորս միլիոն եվրո արժողությամբ և տեխնիկական աջակցության այլ ծրագրեր՝ ընդհանուր առմամբ մոտ քսաներեք միլիոն եվրոյի չափով։ Այս ծրագրերը հանդիսանում են Եվրոպական հարևանության քաղաքականության շրջանակներում Հայաստանին տրամադրվող լայնածավալ օժանդակության մաս»։ 

ՀՀ-ում ԵՄ պատվիարկության ղեկավարի տեղակալ Օննո Սիմոնսը նկատում է նաև, որ այնուամենայնիվ, ԵՄ-ն բազում աշխատանքներ և բարեփոխումներ ունի կատարելու Հայաստանում։ Այս ջանքերին խթանելու նպատակով ԵՄ-ն արձագանքել է Կառավարության պահանջին՝ օժանդակելու բյուջետային աջակցության երկրորդ փուլը ավարտին հասցնել։ Դրանք ուղղված կլինեն արդարադատության ոլորտի արյունավետությանն ու մատչելիությանը, այլընտրանքային պատիժների համակարգի ներդրմանը, քրեական օրենսգրքի վերանայմանը և մի շարք այլ հարցերին։

ՀՀ արդարադատության նախարար Հրայր Թովմասյանն իր խոսքում նշեց. «ԵՄ-ն շարունակում է մնալ ՀՀ սոցիալ-տնտեսական, քաղաքական բոլոր ոլորտների գլխավոր գործընկեր։ Օգտագործվեց «կառավարության պահանջ» բառը, բայց  իրականում մենք խնդրում ենք և ԵՄ-ին տեսնում ենք գործընկեր։ ԵՄ-ն աջակցում է մեր ծրագրերին։ Այն բարեփոխումները, որոնք իրականցվում են ԵՄ-ի տարբեր գործիքների միջոցով, որակական փոփոխություններ են, և դրանք ոչ միայն արդարադատության, այլ մնացած ոլորտներին ևս վերաբերում են»։

Հրայր Թովմասյանը նկատում է նաև, որ եթե մեկուկես տարի առաջ հինգ րոպեում իրավաբանական անձ գրանցելը ծիծաղ կառաջացներ, հիմա այն Հայասատանում իրականացվում է։ Բնականաբար այստեղ կոռուպցիոն ռիսկերը վերանում են։ «Ես այս փոփոխություններն անվանում եմ որակական փոփոխություններ»,-հավելեց նախարարը։

«Առ այսօր ԵՄ աջակցության որոշ կոնկրետ արյունքներ են հանդիսանում դատարանների նոր շենքերի կառուցումը և գործող շենքերի  վերանորոգումը, դատարաննեում էլեկտրոնային տեղեկատվական տերմինալների տեղադրումը, արբիտրաժային և պրոբացիոն համակարգերի խթանումը և դատարանների փաստաթղթային կառավարման նոր համակարգի ներդրումը, ստեղծվել է նաև փաստաբանների դպրոց փորձաքննություն են անցել բազմաթիվ իրավական ակտեր». նշվեց հայտարարության մեջ։