ԲՀԿ-ն ձգտելու է քաղաքական ուժերի առավել մեծ կոնսոլիդացիայի

Երեկ ԱԺ «Բարգավաճ Հայաստան» խմբակցության քարտուղար Նաիրա Զոհրաբյանը հանդես էր եկել հայտարարությամբ և ներկայացրել իր կուսակցության մոտեցումներն առաջիկա նախագահական ընտրությունների և երկրի կառավարման համակարգի վերաբերյալ։

Հայտարարությունում շեշտվում է կառավարման խորհրդարանական համակարգին անցում կատարելու անհրաժեշտությունը և այդ կապակցությամբ ԱԺ-ում 100% համամասնական ընտրակարգին անցնելը։ Ըստ այդմ, ԲՀԿ-ն կսկսի խորհրդակցությունները քաղաքական ուժերի հետ։

Որոշ ժամանակ առաջ Նաիրա Զոհրաբյանը հայտարարել էր, որ ԲՀԿ-ն որևէ ձևաչափով չի համագործակցի «Ժառանգություն» կուսակցության հետ։

Լուրեր.com-ի հետ զրույցում Նաիրա Զոհրաբյանը, պատասխանելով հարցին, թե այս պարագայում խորհրդակցություն «Ժառանգության» հետ կլինի, թե՝ ոչ, ասաց. «Մենք ասել ենք, որ այս հայտարարությունը դիտեն առաջարկ՝ ուղղված քաղաքական բոլոր ուժերին նախագահական ընտրություններից առաջ համակարգային լրջագույն փոփոխությունների շուրջ քաղաքական մեկ միասնական օրակարգ կազմելու վերաբերյալ։ Մեր առաջարկը բաց է, և քաղաքական ուժերը կարող են ներկայացնել օրակարգի իրենց առաջարկները, մենք չենք առաջարկում բացառապես այդ երկու օրակարգային խնդիրները և չենք սահմանափակում քննարկումների ֆորմատն ու օրակարգը։

Ցանկացած քաղաքական ուժ, որը կարձագանքի մեր առաջարկին, մենք պատրաստ ենք բոլոր քաղաքական ուժերի հետ էլ քննարկել մեր երկրում համակարգային լրջագույն փոփոխությունների խնդիրը»,-նշեց Զոհրաբյանը։

ԱԺ «Բարգավաճ Հայաստան» խմբակցության քարտուղարի խոսքերով՝ իրենք պետք է ձգտեն հասնել այդ գաղափարին, «որովհետև շատ կարևոր է երկրում քաղաքական ուժերի առավել մեծ համախմբում, առավել մեծ կոնսոլիդացիա ստեղծելը»։

«Կարծում եմ, որ մեզ կհաջողվի տարբեր քաղաքական ուժերի հետ, որոնք տարբեր ժամանակներում ահա այս գաղափարները առաջարկել և պաշտպանել են, ստեղծել քաղաքան միասնական օրակարգ և քննարկել այդ խնդրիները»,-ասաց Նաիրա Զոհրաբյանը։