ԱՄՆ-ն տեղյակ չէր, որ Բաքվում ԱՄՆ-ի դեսպանին թույլ չեն տվել այցելել հայկական գերեզմանատուն

ԱՄՆ-ի Պետքարտուղարությունում տեղյակ չեն եղել, որ Ադրբեջանի իշխանությունները չեն թույատրել այդ երկրում ԱՄՆ-ի դեսպան Ռիչարդ Մորնինգսթարին այցելել Ջուլֆայի (Նախիջևան) հայկական գերեզմանատուն:

Ինչպես նախկինում հաղորդում էր ИА REGNUM-ը, Նախիջևան կատարած իր վերջին այցը մեկնաբանելով՝ Մորնինգսթարն իր ափսոսանքն է հայտնել այն կապակցությամբ, որ Ադրբեջանի պաշտոնական անձինք անհնար են համարել դեսպանի այցելությունը հայկական գերեզմանատուն՝ բացատրելով դա անվտանգության նկատառումներով: «Տարածաշրջանի ժառանգության պահպանումը շատ կարևոր է ապագա խաղաղության պահպանման համար: Լեռնային Ղարաբաղի հակամարտության արդյուքնում տարածաշրջանում շատ հուշարձաններ արդեն ոչնչացվել են»,- ասել է դեսպանը:

ԱՄՆ-ի Պետքարտուղարության պաշտոնական ներկայացուցիչ Վիկտորյա Նուլանդը, պատասխանելով լրագրողների այն հարցին, թե Պետքարտուղարությունը ստացել է արդյոք բացատրություններ Բաքվից, ասել է. «Ես ձեզ կուղարկեմ Բաքվում գտնվող մեր դեսպանատունը: Անկեղծ ասած, ես առհասարակ տեղյակ չէի այդ միջադեպի մասին»,-փոխանցում է գործակալությունը:

Հիշեցնենք, որ Ադրբեջանում ԱՄՆ-ի դեսպան Ռիչարդ Մորնինգսթարը հանդես էր եկել հայտարարությամբ տարածաշրջանում մշակութային ժառանգության պաշտպանության հարցով։ Հայտարարության մեջ մասնավորապես նշվում է, որ Ադրբեջանում դեսպանի պաշտոնում նշանակվելուց հետո Մորնինգսթարը սկսել է ծանոթանալ երկրի մշակույթի և պատմության հետ։ Տարածաշրջանը բարդ պատմություն ունի, և ղարաբաղյան հակամարտությունը պատճառ է դարձել հազարավոր մարդկանց մահվան, լրջորեն ազդել է կարևոր կրոնական և մշակութային նշանակություն ունեցող վայրերի վրա։ «Այցելելով Նախիջևան՝ ես պաշտոնական անձանց հետ քննարկել եմ Ջուղայում հայկական հնագույն գերեզմանոցի քանդման հարցը։ Ցավում եմ, որ պաշտոնական անձինք անհնար են դարձրել իմ այցելությունն այս վայր՝ պատճառաբանելով արգելքն անվտանգության նկատառումներով»,-նշված է հայտարարության մեջ։