Եթե իշխանությունը կամք ունի, ապա կարող է հասնել կոռուպցիայի նվազմանը. Արմեն Մարտիրոսյան

«Նախագահի անցկացրած խորհրդակցությունները, վարչապետի հրավիրած նիստերը, դեռ կոռուպցիայի դեմ պայքար չեն: Դա կարելի է դիտարկել որպես PR նախագահական ընտրություններից առաջ»,-լրագրողների հետ հանդիպմանն ասաց «Ժառանություն» կուսակցության փոխնախագահ Արմեն Մարտիրոսյանը և հավելեց, որ եթե իշխանությունը կամք ունի, ապա կարող է հասնել կոռուպցիայի նվազմանը: «Ժառանգությունը» ներկայացրել է իր առաջարկները, և եթե իշխանությունն արձագանքի դրանց, ապա մենք պատրաստ ենք համատեղ պայքարել կոռուպցիայի դեմ»,-ասաց վերջինս։

Արմեն Մարտիրոսյանի խոսքով՝ «Ժառանգությունը» պատրաստ է առաջարկներ լսել ցանկացած քաղաքական ուժից և խորհրդակցել նրանց հետ, սակայն հավելեց, որ դեռևս չի քննարկվել ԲՀԿ-ի առաջարկը խորհրդարանական կառավարման համակարգին անցնելու վերաբերյալ, ուստի վերջնական դիրքորոշում կդժվարանա հայտնել:

Անդրադառնալով թիվ 1 ընտրատարածքում Ստեփան Սաֆարյանի առաջադրմանը՝ կուսակցության փոխնախագահն ասաց. «Ստեփան Սաֆարյանը պետք է պետությանն ու հասարակությանը, և սա հասարակության պայքարն է լինելու, ոչ թե Ստեփան Սաֆարյանի: Նա այլևս պայքարելու խնդիր չունի, քանի որ մեր թեկնածուն  կայացած է քաղաքական դաշտում»:

Ըստ Արմեն Մարտիրոսյանի՝ Ավանում արդեն սկսվել է վարչական ռեսուրսի օգտագործումը. մանկապարտեզներում, դպրոցներում ծնողներից անձնագիր են պահանջում։