Հայաստանում իրավիճակն անհեթեթ է. Ստյոպա Սաֆարյան

«Ժառանգություն» կուսակցության ներկայացուցիչ Ստյոպա Սաֆարյանը Facebook սոցցանցի իր էջում գրել է.

«Ֆեյսբուկյան իմ լավ ընկեր Ալբերտ Ունուսյան-ը մի հրաշալի խնդիր բարձրացրեց, որը պատճառ դարձավ սույն ստատուսը գրելու համար: Չքնաղագույն պուրակների ու հրաշագեղ այգիների հայրենիքներից մեկում՝ Անգլիայում, այգի հիմնելու ժամանակ միառժամանակ արահետներ չեն անում: Սպասում են, որպեսզի տեսնեն, թե մարդկային հոսքերի համար որոնք են նախընտրելի կարճ ու օպտիմալ ճանապարհները: Դրանից հետո միայն ՛օրինականացնում՛ են արահետները ու սալիկապատում մրադկանց տրորած ճանապարհը: Այդպես վարվում են նաեւ բնակարանների ձեւավորման ժամանակ. մինչ կտեղադրենք կահույքը, տեսնում են, թե այդ բնակելի տարածքում հիմնական շարժը որ ուղղություններով է, ինչը ինչին է խանգարում եւ ինչ կխանգարի անցուդարձին: Անձամբ հաճախ հիացել եմ, երբ չափազանց փոքր բնակելի տարածքում կահույքը այնպես է տեղադրված եղել, որ մի նեղ արահետով քայլելու դեպքում ոտքդ կահույքն ու սենյակային առարկաներին չես խփում: Իսկ Հայաստանում իրավիճակն անհեթեթ է, որ երբեմն չես հասկանում, թե ինչու եւ ինչ տրամաբանությամբ է տվյալ զեբրան կամ անցումը նախատեսվել փողոցի հենց այդ տեղում: Եւ հաճախ ես տեսնում, որ որքան էլ քաղքապետարանը դրանք սահմանել է, միեւնույնն է, քաղաքացիները անցնում են իրենց համար ռացիոնալ ու օպտիմալ տեղերով: Ու հետո էլ զարմանում ենք, թե ինչու մարդիկ որոշ անցումներով չեն անցնում, այլ անցնում են այն վայրերից, որտեղ ամենօպտիմալն է: Իհարկե, ասվածը համատարած կիրառելի չէ բոլոր դեպքերի վրա, քանի որ քաղաքացիներն էլ խախտումներ անում են՝ ալարելու, սովորույթի ուժի պատճառով: Բայց քաղաքապատերանն էլ պետք է հասկանա, որ ժամանակակաից աշխարհը արդեն այդ խնդիրները լուծելու ձեւերը գտել է ու ընդամենը ցանկություն է պետք այդ լուծումներին ծանոթանալու համար: Հա, մի փոքր էլ տառաճանաչություն՝ միջազգային փորձը կարդալու համար:ՃՃՃ»