Ֆրանսիայի կառավարությունը կքննարկի նույնասեռ ամուսնությունների օրինականացումը

Ֆրանսիայի կառավարությունն այսօր կքննարկի երկրում միասեռական ամուսնությունների օրինականացման ծրագրերը. հաղորդում է BBC-ն։

Ավելի վաղ իր նախընտրական քարոզարշավի ընթացքում Ֆրանսուա Օլանդը, ով նախագահի պաշտոնում ընտրվեց 2012 թվականի գարնանը, խոստացել էր լայնացնել նույնասեռ զույգերի իրավունքների շրջանակը, թույլ տալ նրանց երեխաներ որդեգրել։ Ֆրանսիան արդեն թույլ է տալիս հոմոսեքսուալ զույգերին քաղաքացիական ամուսնություն կնքել, ընդ որում, նույնասեռ ամուսնությունների օրինականացման ծրագրերն առաջացրին ֆրանսիական հասարակության մի մասի կոշտ քննադատութունը։

Անցյալ շաբաթ ամենաբարձր աստիճանի կաթոլիկ հոգևորականը՝ արքեպիսկոպոս Անդրե Արման Վեն-Տրուան, կոչ էր արել իր խնամյալներին դուրս գալ փողոց և երթերով արտահայտել իրենց բողոքը նույնասեռ ամուսնությունների օրինականացման դեմ։ Նրա խոսքերով՝ նման ամուսնությունները կարող են «խախտել հավասարակշռությունը» հասարակության մեջ։ Հազարից ավելի քաղաքապետեր փաստաթուղթ են ստորագրել նույնասեռ ամուսնությունների օրինականացման դեմ։ Երկրի 75 քաղաքներում բողոքի ակցիաներ են անցկացվել այս նախաձեռնության դեմ։

Ֆրանսիական խորհրդարանում այս հարցի քննարկումը կկայանա 2013 թվականին։