Պուտինի քաղաքական որոշման սկանդալի իրական ստվերները

Ռուսաստանի նախագահ Վլադիմիր Պուտինը կոռուպցիոն մեղադրանքներով պաշտոնանկ է արել ՌԴ պաշտպանության նախարարին: Ըստ միջազգային փորձագետների՝ վերջինս համարվում էր Պուտինի մերձավոր շրջապատի անձանցից մեկը, սակայն ընթացքը կանխատեսում է, որ Սերդյուկովը գործընթացի արդյունքում պետք է պատասխանատվություն կրի ռազմական ծախսերի համար հատկացված գումարների յուրացման խնդրով:

ՌԴ նախագահը հայտարարել է. «Հաշվի առնելով ՌԴ պաշտպանության նախարարի շուրջ ստեղծված իրավիճակը՝ անհրաժեշտ է պայմաններ ստեղծել՝ վարելու օբյեկտիվ հետաքննություն»:

Ուշագրավ է, որ Սերդյուկովին փոխարինել է Սերգեյ Շոյգուն, ով հայտնի է որպես Կրեմլի և Պուտինի հավատարիմ անձ և հանձնարարականների «աներկբա կատարող»: Որոշ վերլուծաբանների կարծիքով՝ վերջինս համարվում է փոխվարչապետի իրական թեկնածու՝ հաշվի առնելով Դ. Մեդվեդևի նվազող վարկանիշը քաղաքական դաշտում:

Ակնհայտ է, որ ՌԴ պաշտպանության նախարարի պորտֆելն իրենից վիթխարի ուժ է ներկայացնում, և որ նշյալ գերատեսչությանն են տարեկան հատկացվում միլիարդավոր դոլարներ, որը տիրապետում է երկրի պաշտպանական արդյունաբերությանը՝ իր արտադրական միավորներով համարվելով համաշխարհային սպառազինություն արտադրող երկրներից առաջատարը:

Ուշագրավ է մի փաստ ևս, Սերդյուկովի գործունեության դեմ վերը նշված կոշտ հայտարարություններից հետո Վ.Պուտինը, ներկայացնելով ՊՆ նոր նախարարին, ընդգծել է, որ Ս.Շոյգուի հետ համատեղ ծրագրել է բանակի բերափոխման հսկայական ծրագրեր իրականացնել:

Ըստ տարբեր աղբյուրների հաղորդման, որոնք առավել փորձագիտական խմբեր են ներկայացնում՝ հաղորդագրություններ են ստացվել, ըստ որոնց՝ Պուտինը, փորձելով երկրում կոռուպցիայի դեմ պայքարի գործընթացում իրական կշիռ ապահովել, թիրախային օղակ է ընտրել ժամանակին անձեռնմխելի համարվող արդեն նախկին պաշտպանության նախարարին, որը, ըստ փորձագետների, վերջին ժամանակահատվածում այնքան էլ չի գոհացրել երկրի նախագահին:

Առավել լուրջ ընթացք տալու համար վերը նշված քաղաքական որոշմանը՝ Պուտինը հայտարարել է, որ ավելի քան մեկ տասնամյակ երկրի ռազմական գերատեսչությունում լուրջ ծաղկում է ապրել կոռուպցիան, որը հաստատվել է երկրի գլխավոր դատախազի կողմից: Հատկանշական է, որ հատուկ հանձնարարությամբ, ՌԴ-ի իրավապահ մարմինները հետաքննություն են իրականացնում Սերդյուկովին պատկանող անձնական անշարժ գույքի դաշտում:

Արևմտյան փորձագետ Թոմաս Գոլթսի գնահատմամբ՝ ՌԴ նախկին նախարարի՝ բանակում իրականացվելիք բարեփոխումներին դեմ է եղել նաև Կրեմլի հավակնոտ գործիչներից փոխվարչապես Դմիտրի Ռոգոզինը, ով վերահսկում է երկրի պաշտպանական արդյունաբերության օղակը: Ըստ փորձագետի՝ վերջինս բավականին լուրջ դեր է խաղացել Սերդյուկովի պաշտոնանկության հարցում:

Ամեն դեպքում, ՌԴ վարչակարգը հանձինս երկրի նախագահի ինչքան էլ փորձի ԶԼՄ-ների դաշտում լցոնել քաղաքական որոշման արդարացիության գործոնը՝ այն հիմնավորելով իբր նոր բացահայտված հանցանք կոռուպցիոն դաշտում, ակնհայտ է, որ դա Պուտին-Սերդյուկով անհամաձայնության հետևանք է, որը թերևս իր պատճառների ու հետևանքների մասին կբարձրաձայնի հետագայում:

Հ.Գ. Սերգեյ Շոյգուն 57 տարեկան է, 1994-2012-ը ղեկավարել է ՌԴ Արտակարգ իրավիճակների նախարարությունը: Բանակի գեներալ է: Ներկայումս ստանձնել է ՌԴ պաշտպանության նախարարի պաշտոնը:

Լյուդմիլա Սարգսյան