Սիրիայի մայրաքաղաքում իրավիճակը սրվել է

Մեծ Բրիտանիայում գործող «Սիրիայում մարդու իրավունքների դիտակետ» կազմակերպության հաղորդման համաձայն` երկուշաբթի օրվանից ծանր մարտեր են ընթանում Դամասկոսի Թադամոն և Յարմուկ շրջաններում: Վերջինս գտնվում է պաղեստինցի փախստականների ճամբարներից մեկի մոտակայքում: Ակտիվիստների համաձայն՝ կառավարական օդուժը հարվածներ է հասցրել նաև Դամասկոսի մի քանի այլ շրջանի ուղղությամբ:

Հիշեցնենք, որ Սիրիայի ընդդիմադիր կազմակերպությունները Քաթարի մայրաքաղաք Դոհայում կիրակի օրը մեկնարկել են բանակցություններ, որոնք նպատակ են հետապնդում կազմավորելու միասնական ճակատ և ստանալ միջազգային ճանաչում, ինչը կարող է ավելացնել նախագահ Բաշար ալ Ասադին պաշտոնից հեռացնելուն ուղղված պայքարն ավարտի հասցնելու հավանականությունը:

Դոհայում հանդիպումների առաջին չորս օրը նվիրված կլինի Սիրիայի տարածքից դուրս գործող ընդդիմադիր ամենախոշոր կազմակերպությանը՝ Սիրիայի ազգային կոնգրեսը փախուստի մեջ գտնվող կառավարության վերածելուն:

Ընդդիմության ներկայացուցիչների ավելի լայն շրջանակի հանդիպման ընթացքում կկազմավորվի միասնական կոալիցիա, որը կներառի ապստամբների մարտիկներին և Սիրիայում գործող այլ կազմակերպությունների ներկայացուցիչներին: Սիրիայում ապստամբությունը շարունակվում է արդեն մոտ 20 ամիս: Տարբեր գնահատականների համաձայն՝ հակամարտությունը մոտ 36 հազար զոհի պատճառ է դարձել: