Հայաստանի դպրոցներում ԼՂ-ից տեղահանված երեխաներին ընդունելու համար ծնողները պետք է դիմեն իրենց մոտ կրթական հաստատություն

Հայաստանի Հանրապետության տարբեր դպրոցներում հոկտեմբերի 12-ի տվյալներով սովորում է Լեռնային Ղարաբաղից բռնի տեղահանված 13 հազար 320 երեխա, նրանցից 4 հազար 202-ը՝ Երևանում, 2 հազար 310-ը՝ Կոտայքում, 1853-ը՝ Արարատի մարզում և ավելի փոքր բաշխվածությամբ Հայաստանի այլ մարզերում, այս մասին հոկտեմբերի 12-ին «Հումանիտար կենտրոն»-ում կայացած ասուլիսում հայտնեց ԿԳՄՍ նախարարի տեղակալ Արաքսիա Սվաջյանը:

«Շատ ծնողների անհանգստացնում է երեխաներին դպրոցներում տեղավորելու հարցը: Ծնողները պետք է դիմեն այն դպրոց, որը մոտ է այն վայրին, որտեղ իրենք հաստատվել են: Եթե դպրոցում լիցենզիայով տեղեր առկա են, ապա առանց որևէ խոչընդոտի, առանց փաստաթղթերի ներկայացման երեխան կընդունվի, եթե լիցենզավորված տեղերը սպառված են, անհրաժեշտ է դիմել հարևանությամբ գործող որևէ դպրոց, որտեղ տեղեր կլինեն, կամ մարզում դիմել մարզպետի աշխատակազմի կրթության վարչություն, որտեղ հստակ վերլուծություն է կատարվում: Այնտեղ ծնողին կուղղորդեն դպրոց ընտրելու հարցում, իսկ Երևանի պարագայում կարող են դիմել Երևանի քաղաքապետարան»,-նշեց նա:

Սվաջյանի խոսքով՝ կան բնակավայրեր, որտեղ գրեթե բոլոր դպրոցները ծանրաբեռնված են: Այդ պարագայում հնարավորություն է տրվում երեխաներին ընդգրկելու այն դպրոցներում, որտեղ լիցենզիայով տեղերն արդեն լրացած են. երեխայի կրթության իրավունքը պաշտպանելու համար նման հնարավորություն ընձեռնվում է: