Իրաքում փոխվարչապետը հանդիպեց հայ համայնքի ներկայացուցիչներին

ՀՀ փոխվարչապետ, Տնտեսական համագործակցության հարցերով հայ-իրաքյան միջկառավարական համատեղ հանձնաժողովի համանախագահ Արմեն Գևորգյանի գլխավորած պատվիրակությունը Իրաքի Հանրապետություն այցը նոյեմբերի 6-ի երեկոյան սկսել է հայ համայնքի ներկայացուցիչների հետ հանդիպումից: Պատվիրակության կազմում են ՀՀ առողջապահության նախարար Դ. Դումանյանը, գյուղատնտեսության նախարար Ս. Կարապետյանը, արտաքին գործերի, էկոնոմիկայի, էներգետիկայի և բնական պաշարների փոխնախարարները, պաշտոնատար այլ անձինք: Մինչ հանդիպումը, փոխվարչապետը և պատվիրակության մյուս անդամները ծաղիկներ դրեցին Բաղդադի Սբ Գրիգոր Լուսավորիչ առաջնորդանիստ եկեղեցու բակում Հայոց ցեղասպանության զոհերի հիշատակը հավերժացնող խաչքարին:

Եկեղեցում էլ տեղի է ունեցել հանդիպումը, որին ներկա էին Ազգային կենտրոնական վարչության, համայնքում գործող ազգային կազմակերպությունների անդամներ: Իրաքի հայոց թեմի առաջնորդ Ավագ արքեպիսկոպոս Ասատուրյանը ողջունել է Հայաստանի պաշտոնական պատվիարակության այցը Իրաք, նկատելով, որ վերջին տարիների ընթացքում սա հայրենիքից ժամանած առաջին նման պատվիրակությունն է և նշելով, որ այդ այցերը ոգեշնչում են համայնքին:

Փոխվարչապետը ողջունել է ներկաներին, ընդգծելով, որ Իրաքի հայ համայնքը պատմություն և ավանդույթներ ունեցող այն գաղթօջախներից է, որը գոյության ընթացքում բազմաթիվ փորձությունների միջով է անցել: «Գիտենք, թե ինչպիսի դժվարությունների միջով է անցել իրաքահայ համայնքը վերջին տարիներին: Հուսով եմ, որ այդ ամենն արդեն անցյալում է, և հայ համայնքն արագ կվերականգնի ուժերը ու իր նպաստը կունենա երկու երկրների հարաբերությունների զարգացմանը»,-ասել է փոխվարչապետը:

Նա գնահատելի է համարել համայնքի և համայնքային կազմակերպությունների աշխատանքն ու դերը ազգային հոգևոր և մշակութային արժեքների պահպանության գործում: Փոխվարչապետը վստահեցրել է, որ Հայաստանը մշտապես լինելու է սփյուռքահայ հայրենակիցների կողքին' նշելով, որ ՀՀ սփյուռքի նախարարության ստեղծումը սփյուռքի հայրենակիցների խնդիրներին ավելի մեծ ուշադրություն դարձնելու, հայրենիք-Սփյուռք հարաբերություններին ավելի համակարգված բնույթ հաղորդելու նպատակ ուներ, և վերջին տարիներին այդ ուղղությամբ լուրջ աշխատանք է իրականացվում:

Հանդիպմանը քննարկվել են համայնքային կյանքին, Իրաքի ներքին իրավիճակին, համայնքին հուզող խնդիրներին վերաբերող հարցեր:
Երեկոյան փոխվարչապետի գլխավորած պատվիրակությունը մասնակցել է Իրաքի փոխվարչապետ Ռոշ Նուրի Շուայեսի անունից պաշտոնական ընդունելությանը: Հանդիպմանը երկու երկրների փոխվարչապետները քննարկել են միջկառավարական հանձնաժողովի առաջին նիստի օրակարգին, ինչպես նաև երկկողմ հարաբերությունների խորացմանն առնչվող հարցեր: