Հայ-իրաքյան միջկառավարական հանձնաժողովի անդրանիկ նիստ Բաղդադում

Բաղդադում այսօր տեղի է ունեցել Տնտեսական համագործակցության հարցերով հայ-իրաքյան միջկառավարական համատեղ հանձնաժողովի անդրանիկ նիստը՝ ՀՀ փոխվարչապետ, տարածքային կառավարման նախարար Արմեն Գևորգյանի և Իրաքի Հանրապետության փոխվարչապետ Ռոշ Նուրի Շաուեյսի համանախագահությամբ:

Հայաստանի և Իրաքի պատվիրակությունների ղեկավարները ներկայացրել են երկրների տնտեսական իրավիճակը, ինչպես նաև քննարկել են տնտեսական, առևտրի, ներդրումների և գիտատեխնիկական համագործակցությանն առնչվող հարցեր: Երկուստեք կարևորվել է առևտրատնտեսական հարաբերությունների և ապրանքափոխանակության մակարդակի բարձրացման ու ընդլայնման անհրաժեշտությունը:

Իրաքյան կողմը տեղեկություններ է ներկայացրել Հայաստանում դեսպանատան վերաբացման ուղղությամբ կատարվող աշխատանքների մասին: Նշվել է, որ մինչև տարեվերջ կլուծվի նաև Հայաստանում Իրաքի դեսպանի նշանակման հարցը: Իրաքյան կողմը նաև տեղեկացրել է, որ հետաքրքրությամբ են ծանոթացել Բաղդադի միջազգային 39-րդ առևտրի ցուցահանդեսում Հայաստանի տաղավարում ներկայացված արտադրանքին: Առաջարկ է եղել կազմակերպել հայկական արտադրանքի առանձին ցուցադրություն:

Պայմանավորվածություն է ձեռք բերվել անցկացնել հայ-իրաքյան գործարար համաժողով, որի շրջանակում էլ կարող է կազմակերպվել նշված ցուցահանդեսը:

Գյուղատնտեսության ոլորտում փոխգործակցության համատեքստում քննարկվել են գյուղմթերքի, հանքային և խմելու ջրերի, պահածոների արտահանման հնարավորությունները: ՀՀ գյուղատնտեսության նախարար Ս. Կարապետյանը տեղեկություններ է ներկայացրել Հայաստանում սննդի անվտանգության ոլորտում իրականացվող աշխատանքների մասին` նշելով, որ արտահանվող սննդի որակի հետ կապված խնդիրները կառավարության ուշադրության կենտրոնում են: Այդ ուղղությամբ համապատասխան ծրագրեր են մշակվել և իրականացվում Եվրամիության հետ:

Քննարկվել են նաև տնկիների և սերմերի արտադրության, ոռոգման ժամանակակից տեխնոլոգիաների և ջրի օգտագործման բնագավառում փորձի փոխանակման, գյուղատնտեսական գիտակրթական հաստատությունների միջև կապերի հաստատման, մասնագետների վերապատրաստման հարցեր:

Առողջապահության ոլորտում կողմերը կարևորեցին կադրերի պատրաստման, բուժհաստատությունների միջև կապերի հաստատման ոլորտներում փոխգործակցությունը: Անդրադարձ եղավ դեղերի համատեղ արտադրություն հիմնելու հնարավորություններին: Քննարկվեցին Իրաքից Հայաստանում բուժման նպատակով հիվանդների ուղեգրման կազմակերպման հարցեր: Այս համատեքստում ՀՀ առողջապահության նախարար Դ. Դումանյանը պատրաստակամություն հայտնեց Երևանում տասը իրաքցի երեխաների անվճար վիրահատություն կազմակերպել:

Էներգետիկայի և բնական պաշարների բնագավառում փոխգործակցության ծրագրի մշակման պայմանավորվածություն է ձեռք բերվել: Կողմերը համաձայնության են եկել համագործակցել նավթագազային արդյունահանման բնագավառում:

Կողմերը կարևորել են նաև կայուն օդային հաղորդակցության հաստատման ուղղությամբ աշխատանքները:

Ձեռք են բերվել կոնկրետ պայմանավորվածություններ' մի շարք ոլորտներում համաձայնագրերի ստորագրման, համատեղ ծրագրերի իրականացման, գործարար ուղիղ շփումների ակտիվացման, ներդրումներին վերաբերող տեղեկատվական նյութերի, փորձի փոխանակման վերաբերյալ:

Պայմանավորվածություն է ձեռք բերվել նաև աշխատանքային խմբի ստեղծման վերաբերյալ, որը կզբաղվի երկու երկրների միջև ցամաքային հաղորդակցության արդյունավետ ուղիների հնարավորությունների ուսումնասիրմամբ, կներկայացնի առաջարկություններ: